Россиянинг Украинадаги босқини бошланганидан буён “Вагнер” хусусий ҳарбий компаниясининг 30 мингдан ортиқ ёлланма аскари ҳалок бўлди ёки яраланди, деди АҚШ Миллий хавфсизлик кенгаши вакили Жон Кирби. Унинг сўзларидан CNN иқтибос келтирмоқда.
Оқ уй маълумотларига кўра, тўққиз мингга яқин россиялик ҳалок бўлган, уларнинг ярми 2022 йил декабрь ойи ўрталаридан бери ўлдирилган. Кирбининг таъкидлашича, декабрь ойида ўлдирилганларнинг қарийб 90 фоизи Россия қамоқхоналаридан ёлланган аскарлар эди.
“Улар ўз аскарларига, асосан, маҳкумларга ғайриинсоний муносабатда бўлиб, уларни тўғридан тўғри гўшт майдалагичга отгандек улоқтирмоқда. У (“Вагнер” асосчиси Евгений Пригожин) қамоқдан одамларни шунчаки олиб, тайёргарликсиз, зарур қуролларсиз, ташкилий қўмондонсиз жанг майдонига ташламоқда”, — деди Кирби. Унинг сўзларига кўра, “Вагнер”да маҳбусларни ёллаш камаймаган.
АҚШ Давлат департаменти котиби ўринбосари Виктория Нуланд февраль ойи бошида Россия йил давомида 200 мингдан ортиқ одамидан айрилгани ҳақида айтганди. Британия маълумотларига кўра, “Вагнер” ёлланма жангчилари орасида йўқотишларнинг умумий сони, тахминан, 50 фоизга етади.
АҚШ ва Буюк Британия “вагнерчи”лар сонини 40—50 минг кишига баҳолаган. Январь ойида “Рус сидяшая” фонди раҳбари Олга Романова “Вагнер” гуруҳи 50 минг маҳбусни жалб қилган бўлиши мумкинлигини айтди. Романованинг таъкидлашича, фронтда 10 мингга яқин одам қолган, бошқалари эса ўлган, яраланган, бедарак йўқолган, ташлаб кетилган ёки асирга олинган.
Изоҳ (0)