“Бу одам нима ҳақида гапираётганини билмайди”. Twitter собиқ ходими Маскнинг реклама ҳақидаги сўзларини танқид қилди

Twitter’да аввал рекламалар бўйича етакчи бўлиб ишлаган собиқ ходим тармоқ эгаси Илон Маскнинг рекламага оид постини танқид қилди. 

Маск ўз постида Twitter лентасидаги “безовта қилувчи” рекламалар учун фойдаланувчилардан узр сўраган.

“Биз рекламаларни Google қидирув тизимидаги каби твитлардаги калит сўзлар ва мавзуларга боғлаш бўйича тузатишлар чорасини кўряпмиз. Бу контекстга алоқадорликни сезиларли даражада яхшилайди”, — дейилган унинг твитида.

Бунга собиқ ходим шундай жавоб қайтарди: “Twitter’даги рекламалар бўйича собиқ етакчи сифатида ишонч билан айта оламанки, бу одам нима ҳақида гапираётганини билмайди”.

Маск унинг танқидини жавобсиз қолдирмади: “Кечирасиз, сиз даҳо бўлсангиз керак, шунинг учун Twitter дунёдаги энг ёмон реклама майдони. Twitter’да деярли ҳеч ким ҳеч нарса сотиб олмайди, лекин Instagram’да деярли ҳамма сотиб олади. Бу тузатилмоқда”.

Маълумот учун, Илон Маск Twitterъни сотиб олиш бўйича келишувни 27 октябрь куни якунлаб, компания учун 44 миллиард доллар тўлаган.

Шундан сўнг тадбиркор ижтимоий тармоқ ходимларининг ярмига яқинини ишдан бўшатди, қолганларни эса юқори интенсивлик билан ишлаш кераклиги ҳақида огоҳлантирди.

ОАВ хабарларига кўра, ушбу воқеалар фонида платформа фаолиятини сақлаб қолиш учун муҳим бўлган кўплаб ходимлар Twitter’ни тарк этган.

Хусусан, CNBC Twitter Маск томонидан сотиб олинганидан сўнг компания ходимларининг қарийб 80 фоизи ишдан бўшатилгани ёки ўз хоҳиши билан тарк этгани ҳақида ёзди. Маълумотларга кўра, ҳозирда компаниянинг тўлиқ штатдаги ходимлари сони қарийб 1,3 минг кишини ташкил этмоқда.