АҚШ Конгресси Сенатидаги озчилик республикачилар етакчиси Митч МакКоннелл Ф-16 қирувчиларинининг Киевга берилиши ғоясини қўллаб-қувватлади, деб ёзмоқда “РБК”.
“Агар бу менга боғлиқ бўлганда, шундай қилардим. Ҳа, шундай қилардим. Биз уларга (украиналикларга) имкон қадар тезроқ урушда ғалаба қозониши учун зарур бўлган ҳамма нарсани беришимиз керак”, — деди МакКоннелл АҚШ Ф-16 самолётларини Украинага берадими, деган саволга жавобан.
“НАТО иттифоқчилари Украинага кутилганидан кўра кўпроқ қурол бермоқда”, — таъкидлади Макконел. “Аммо жараённи тезлаштириш ва қоғозбозликдан холи қилиш керак”.
Аввалроқ Оқ уй АҚШ бошқа давлатларнинг Украинага қирувчилар беришини олқишлаши, бироқ Америка ҳукуматининг ўзи бундай ёрдамни ваъда бермаслиги ҳақида маълум қилганди.
16 февраль куни бир гуруҳ америкалик сенаторлар АҚШ президенти Жо Байденни Киевга қирувчилар ва узоқ масофага учувчи ракеталар етказиб беришга чақирди. Уларнинг фикрича, Вашингтон украиналик учувчиларни тайёрлашни ҳам бошлаши керак.
“Уларга (украиналикларга) зарур бўлаётган навбатдаги нарса бу қирувчилар. Ҳаво кучларисиз бирлашган қуролли операцияларни амалга ошириб бўлмайди. МиГ-29 самолётлари эскирган”, — деди Жанубий Каролинадан республикачи сенатор Линдси Грем.
The New York Times газетасининг ёзишича, АҚШ президенти маъмурияти Ф-16 самолётларини учинчи давлатлар, жумладан Дания ёки Нидерландия орқали Киевга топширишни истисно этмаган. 10 февраль куни Украина ҳукумати Нидерландияга Ф-16 қирувчиларини сўраб ариза юборди.
Изоҳ (0)