АҚШ президенти Жо Байден мамлакатдаги қуролли зўравонликни “эпидемия” деб атади. Бу ҳақда унинг Оқ уй сайтида чоп этилган баёнотида айтилади.
“Йил бошидан бери энди 48 кун ўтди, мамлакатимизда эса аллақачон камида 73 та оммавий отишма содир этилди. Ҳамдардлик ва ибодат етарли эмас. Қуролли зўравонлик — эпидемия, Конгресс ҳозироқ ҳаракатни бошлаши керак”, — деди давлат раҳбари.
Унинг таъкидлашича, АҚШ “соғлом фикрга асосланган” қурол қонунчилигини ислоҳ қилиши зарур. Булар барча қурол сотувларини текшириш талаби, ҳужум қуроллари ва ўқдони катта автоматларни тақиқлаш кабиларни ўз ичига олиши керак. Бундан ташқари, қурол ишлаб чиқарувчиларга нисбатан чекловлар қўлланиши керак. “Булар одамлар ҳаётини сақлаб қолиш учун Конгресс томонидан ҳозироқ ташланиши мумкин бўлган оқилона қадамлар”, — дея хулоса қилди Байден.
17 февраль куни Миссисипи штатида қуролланган шахс кичик шаҳарчада ўт очиб, қўлга олингунга қадар собиқ рафиқаси ва яна беш кишини уч хил жойда отиб ўлдирди, деб хабар бермоқда Reuters. Отишма 300 кишидан кам одам яшайдиган Аркабутла қишлоғида содир бўлган. 51 ёшли ҳужумчи Ричард Дейл Крам биринчи даражали қотилликда айбланмоқда, чунки отишма одам ўлдириш ниятида қасддан содир этилган.
Январь ойида Калифорнияда бир ҳафта ичида тўртта, бир ой ичида жами олтитда отишма содир бўлди. 28 январь кунги отишма оқибатида 3 киши ҳалок бўлди, яна тўрт киши яраланди.
Изоҳ (0)