Туркияда юз берган кучли зилзила минглаб биноларни вайрон қилгани ортидан ўзбек жамоатчилигида турк қурувчиларига нисбатан бироз ишончсизлик пайдо бўлди. Сейсмология институти директори ўринбосари Воҳидхон Исмоилов “Дарё”га берган интервьюсида бундай фикрда бўлиш нотўғрилигини, турклар дунёдаги етакчи қурувчилар ҳисобланишини айтди.
Воҳидхон Исмоиловнинг таъкидлашича, асосий масала турклар олиб келаётган лойиҳаларни Ўзбекистон қурилиш меъёрларига мослаштириш билан боғлиқ.
“Зилзила юз бергандан кейин албатта, қурбонлар ҳам бўлади. Ўтган кунги матбуот анжуманида журналистлардан бири, зилзилага чидамсиз бинолар қурадиган бўлса, Ўзбекистон нега турк қурувчиларига бино қуриш учун рухсат бермоқда, деб сўради.
Аслида ундай эмас. Турклар дунёдаги энг кучли қурувчилар ҳисобланади. Уларнинг мавқейи жуда юқори. Асосий масала — улар олиб келаётган қурилиш лойиҳаларини Ўзбекистон қурилиш меъёрларига мослаштиришда. Агар мос бўлмаса, у лойиҳалар амалга ошмасин.
Оддий мисол, “Миллий банк”нинг Тошкент шаҳри, Юнусобод туманидаги 26 қаватли биносини Туркиянинг “Айсел” фирмаси қурган. Бино лойиҳаси ҳам ўша компанияники. Бино қурилиши бошланганда, биз тўхтатиб қўйганмиз. Чунки қурилиш лойиҳаси бизнинг меъёрларга тўғри келмайдиган даражада эди. Охири улар мослаштиришга мажбур бўлди. Қурилиш анча вақт тўхтаб қолди. Чунки лойиҳани ўзгартириш керак. Лойиҳа ўзгаргач, “Миллий банк” билан тўполон бўлиб кетди. Охири Япониядан экспертлар олиб келинди ва улар бизнинг эътирозларимизни ўринли деб топди. Сўнгра турклар бинони Ўзбекистон қурилиш меъёрлари бўйича қуриш мажбуриятини олди ва лойиҳани ўзгартирди. Ўша пайтда уларнинг мақсади фундаментни 9 метрга тушириб, бинони кўтариш эди. Биз уни 32 метрга тушириш кераклигини айтганмиз. Кейин биз қўйган талаблар асосида бино мустаҳкам қурилди”, – деди олим.
Воҳидхон Исмоиловнинг маълум қилишича, ҳозирда Ўзбекистондаги ижтимоий объектларнинг барчасида сейсмобардошли паспорт бор.
Маълумот учун, 6 февраль куни Туркияда 7,4–7,8 магнитудали вайронкор зилзилалар содир бўла бошлади.
Мамлакатнинг қатор шаҳарларини вайрон қилган зилзилада, охирги маълумотларга кўра – 31 минг 643 киши ҳалок бўлди, жароҳатланганлар сони 80 минг нафардан ортди. Ҳозирда 166 минг 334 нафар қидирув-қутқарув ва кўмаклашув ходимлари зилзилалар юз берган ҳудудларда ишламоқда. Ҳисоб-китобларга кўра, зилзилалар Туркия иқтисодиётига 84 миллиард доллар зарар етказган.
Изоҳ (0)