O‘zbekiston va “Gazprom” o‘rtasida hamkorlik bo‘yicha yo‘l xaritasining suverenitetga tahdidi yo‘qligi ma’lum qilindi

O‘zbekiston Energetika vazirligi va “Gazprom” kompaniyasi o‘rtasida 24-yanvar kuni gaz sohasida hamkorlik bo‘yicha yo‘l xaritasi imzolandi.

Imzolangan yo‘l xaritaga muvofiq tomonlar o‘rtasida tuzilgan ishchi guruh Qozog‘iston va O‘zbekiston hududidan o‘tuvchi O‘rta Osiyo—Markaz gaz quvuri orqali gaz tranzitini amalga oshirish uchun zarur bo‘ladigan texnik chora-tadbirlarni va o‘rganishni kelishib olindi.

Ishchi guruh texnik jihatdan barcha ishlarni yakunlagandan so‘ng, tabiiy gazni yetkazib berish bo‘yicha asosiy shartlar muhokama qilinadi.

“Shuni alohida ta’kidash lozimki, olib borilgan muzokaralar hamda yo‘l xaritasida O‘zbekistonning mavjud gaz transporti tizimiga egalik huquqini to‘liq saqlagan holda ichki bozorga tabiiy gaz zarur miqdorlarda yetkazib berish maqsad qilingan. Bunda gaz transport tizimi kimgadir berilishi yoki suverenitetimizga qandaydir tahdid umuman yo‘q.

Kelgusida ushbu yo‘nalishdagi barcha ishlar O‘zbekiston Respublikasining milliy manfaatlarini to‘liq himoya qilgan holda amalga oshirilib, natijalari yuzasidan doimiy ravishda jamoatchilikka ma’lum qilib boriladi”, — deyiladi vazirlik bayonotida.