Россия томонидан оккупация қилинган Қримда партизанлар маҳаллий аҳолига рус қўшинлари тўпланган жойлар ҳақида хабар беришни сўраб мурожаат қилди. Бу ҳақда Қрим партизанларининг Telegram-каналида маълум қилинди.
“Агар сиз Россия техникаси, айниқса Қримнинг шимолида тўпланганини кўрсангиз, чат-ботимизга уларнинг жойлашувини аниқ координаталари билан, иложи бўлса фотосурат ва техникалар миқдори, уларнинг ҳолати тавсифи билан юборинг”, — деб сўрамоқда партизанлар.
Улар Россия армияси шахсий таркибининг жойлашув нуқталарини белгилаш муҳимлигини таъкидлаган.
“Бизга яна шу маълумки, Жанкой туманда босқинчилар ўз техникаларини таъмирлаш базаларига эга, улар ҳақидаги маълумотлар ва уларнинг жойлашуви ҳам жуда зарур. Босқинчилар устидан умумий ғалаба қозонишимиз биргаликдаги ҳаракатларимизга боғлиқ”, — дейди Қрим партизанлари мурожаати якунида.
Украина расмийлари Россия билан уруш фақатгина рус қўшинлари босиб олинган барча ҳудудлардан, жумладан, 2014 йилда аннекция қилинган Қримдан олиб чиқиб кетилгандан кейингина тугашини бир неча бор таъкидлаган. Украина ҳукумати вакиллари Қримни қайтариш бўйича эҳтимолий ҳарбий операция ҳақида мунтазам гапириб келади.
АҚШ Қримни Украина ҳудуди деб билади. Шу билан бирга, Россиянинг Украинага кенг кўламли босқинидан сўнг Вашингтон Киевга яриморолдаги нишонларга зарба бера оладиган воситаларни тақдим этишдан бош тортди. Аммо январь ойида The New York Times газетаси АҚШ президенти маъмурияти бу масала бўйича ўз позициясини аста-секин юмшатиб бораётгани ҳақида хабар берди.
Изоҳ (0)