Руминиялик сейсмолог Александр Кендзера Украина ҳам Туркия каби сейсмик фаол зонада жойлашганини ва мамлакатда 8 балли зилзила юз бериши мумкинлигини айтди. Бу ҳақда UNIAN хабар берди.
Мутахассиснинг сўзларига кўра, зилзиланинг олдини олиш имконияти йўқ.
“Сейсмик фаол камар Евросиё плитаси араб плитаси, Африка плитаси ва улар ўртасида ҳосил бўлган бошқа плиталарга босим ўтказиб туриши туфайли ҳосил бўлган. Шубҳасиз, бу плиталарни ҳам тўхтатиб бўлмайди. Эртами-кечми зилзилалар содир бўлади”, — дейди Кендзера.
Украинага энг яқин зилзилалар зонаси Руминия ҳудудида жойлашган, бироқ бу Украина ҳудудларига ер силкиниши таъсир қилмаслигини англатмайди.
“Зилзилалар шу қадар кучли силкинишларни келтириб чиқарадики, улар Украина ва ҳатто Москва, Санкт-Петербургда ҳам сезилади. Зилзила эпицентрига яқин Одесса вилоятининг жануби-ғарбий қисмида 8 балли кучли зилзилалар бўлиши кутилмоқда”, — дейди руминиялик олим.
Туркия ва Суриядаги зилзила
6 февраль куни Туркия жануби-шарқида 7 баллдан юқори бўлган иккита зилзила содир бўлди. Кейин ўнлаб афтершоклар қайд этилди. Ўша куни Сурияда ҳам зилзила юз берди. Туркияда юз берган даҳшатли зилзила қурбонлари сони 24 617 кишига етди, жароҳатланганлар 80 мингдан ошиқни ташкил қилмоқда.
Изоҳ (0)