Олимлар ядровий апокалипсисдан омон қолиши мумкин бўлган энг яхши мамлакатларни аниқлади. Бу ҳақда улар олиб борган тадқиқотга таяниб, «Fokus.ua» хабар берди.
Тадқиқотчилар Метт Бойд ва Ник Уилсон 38 та орол давлатидаги глобал офатлар таъсирини ўрганди. Улар дунё аҳолисинининг камайишига таъсир ўтказувчи техноген ва табиий офатларни кўриб чиқди. Мамлакатларнинг озиқ-овқат ва энергия ишлаб чиқариш имконияти, мавжуд бошпаналар инобатга олинди.
Шу тариқа улар ядровий апокалипсисда Янги Зеландия ва Австралиядаги одамлар омон қолиш эҳтимоли юқорилигини маълум қилди. Кейинги ўринларни Исландия, Соломон ороллари, Вануату давлати, Индонезия, Филиппин ва Маврикий эгаллади.
Янги Зеландия
Янги Зеландия ядровий апокалипсис содир бўлган тақдирда энг хавфсиз жой деб топилди, чунки у ҳароратнинг кескин ўзгаришига чидамли ва ядровий қиш таъсиридан ҳимоя қилувчи океан билан ўралган. Бундан ташқари, у ядро қуролига эга эмас, шу учун йирик давлатлар унга ҳужум қилиши даргумон. Энг ёмон ҳолатда, Янги Зеландия ўз ҳосилининг 61 фоизини йўқотади, лекин барибир омон қолиш учун етарли озиқ-овқатни сақлаб қолади. Асосий муаммо Буюк Британия ва АҚШ билан савдони тўхтатиши, шунингдек, энергия таъминотининг заифлашиши ҳисобланади.
Австралия ва Исландия
Австралияда ҳайвонлар ва экинлар нобуд бўлган тақдирда одамларга омон қолишга ёрдам берадиган озиқ-овқат захираси мавжуд. Исландия НАТОга аъзо бўлгани учун кўпроқ хавф остида, бироқ у қайта тикланадиган энергиянинг кўплаб манбаларига, шунингдек, катта балиқ заҳираларига эга.
“Технологик жамият ҳатто омон қолиш имконияти юқори бўлган мамлакатларда ҳам қулаши мумкин. Бу озиқ-овқат маҳсулотларини ишлаб чиқаришга жиддий тўсқинлик қилади. Озиқ-овқат ва энергия иқлим таъсиридан омон қолиш имкониятини максимал даражада оширишда аҳамиятга эга”, — таъкидлади тадқиқот муаллифлари.
Изоҳ (0)