Ташқи кўринишни яхши сақлаш жисмоний саломатлик кафолатидир. Гавдани эгмаслик, елкаларни тик тутиш, умуртқа поғонасини текис ушлаш, бўйинни тик ҳолатда бўлиши инсоннинг ўзига нисбатан ишончини оширади, стрессни камайтиради ва ҳатто депрессия белгиларини енгиллаштиради — бу илмий жиҳатдан исботланган. Қолаверса, ушбу санаб ўтилганларга амал қилиш орқали ёшроқ кўриниш ҳам осон. Икки дақиқада 10 ёшга ёшроқ кўринишни хоҳлайсизми? “Новий очаг” нашри санаб ўтган маслаҳатларга амал қилиш тавсия этилади.
- Кресло ёки стулда эгилиб ўтириш
Иш жараёни ўтириб ишлашни талаб қиладими? Кресло ёки офис стули гавдага мос баландликда эканига ишонч ҳосил қилиш лозим: агар ҳамма нарса тўғри танланган бўлса, одам автоматик равишда гавдани текис тутади. Аммо бирор нарса мос келмаса, белнинг пастки қисмида зўриқиш пайдо бўлиши мумкин. Гавда олдинга чўзилади, елкалар букилади, натижада умуртқа поғонаси нотекис ҳолатга келади. Тана бу позицияга ўрганиб қолади, вақт ўтиши билан гавда тикланганда, оғриқ пайдо бўлади. Бундан ташқари, ҳақиқий ёшга беш ёки ҳатто ўн йил қўшилиши мумкин.
Телефонни бўйин ва ияк орасига қўйиб гаплашиш
Тан олиш керак, бу ҳолат ҳаммага таниш. Гарчи телефон суҳбати унчалик узоқ бўлмаса, қўллар бўш бўлса ҳам, қачондир телефонни ияк ва бўйин орасига қўйиб гаплашиш мумкин. Агар ушбу ҳолат мунтазам равишда такрорланса, елка бош томонга қийшаяди, мушак ва пайлар ҳам чўзилади. Биринчидан, бошнинг елкага оғиши ташқи кўринишга путур етказади. Узоқ муддатда инсулт хавфи ортади. Шунинг учун қулоқчин сотиб олиш ва ундан фойдаланиш тавсия этилади.
Ётоқда ёки диванда ётиб ишлаш
Айниқса, бу масофадан туриб ишлайдиганлар учун тегишли. Эрталаб уйғониш ва тиқилинч транспортда офисга боришнинг ўрнига, ётоқда шунчаки компьютерни ишга тушириш кифоя. Аммо бу ҳақиқатан ҳам хавфсизми? Ётиб ишлаш жараёнида умуртқа поғонаси доимо таранглашади, елкалар кўтарилади, ияк пастга тушади ва бўйин олдинга чўзилади — бу жуда зарарли одат. Вақт ўтиши билан бу позиция организм учун одатий ҳолга айланиши мумкин ва гавда букилиб қолади.
Қорин билан ухлаш одати
Ухлаш позицияси соғлиқ, феъл-атвор ва ҳатто гўзаллик ҳақида кўп нарсаларни маълум қилиши мумкин. Шифокорларнинг огоҳлантиришича, умуртқа поғонаси учун энг хавфли уйқу ҳолати қорин билан ётишдир. Бўйин ва елка мушакларининг доимий зўриқиши туфайли улар яллиғланиши мумкин, бошни буриш қийин бўлади. Иложи бўлса, ён томонга қараб ухлаш ва сифатли матрас танлаш тавсия этилади.
Рюкзак тақиш
Рюкзак ҳақиқатан ҳам бел учун энг хавфсиз аксессуардир, лекин ундан тўғри фойдаланилсагина. Рюкзак тасмалари жуда узун бўлмаслиги керак, улар бир хил узунликда бўлиши учун аниқ ўрнатилиши, оғирлик бутун орқа томонга, елкадан белга қараб тақсимланиши керак. Агар юқоридан санаб ўтилган талаблар тўғри бажарилмаса, гавданинг барча қисмига оғирлик тушади ва натижада умуртқа поғонаси қийшаяди, елкалар олдинга чўзилади, ҳаракатланиш қийинлашади.
Изоҳ (0)