Ijtimoiy tarmoqlarsiz bir kun, chalg‘imasdan ovqatlanish. Bir yilda hayotingizni o‘zgartiradigan 9 ta tavsiya

Ko‘pincha biz o‘z maqsadlarimizga erisha olmaymiz. Chunki biz hayotdagi biror narsani tubdan o‘zgartirishga harakat qilamiz. Aslida, kichik qadamlarda harakat qilish va kundalik odatlarni asta-sekinlik bilan yangilash yaxshiroqdir.

 

Avvaliga kichik va ahamiyatsiz bo‘lib tuyulgan o‘zgarishlar, agar siz yillar davomida ularga rioya qilishga tayyor bo‘lsangiz, ajoyib natijalarga olib keladi.

 Jeyms Klear,

“Atom odatlar” kitobi muallifi

Harqalay, siz bunga o‘xshash fikrlarni oldin eshitgansiz. Lekin eshitish va bajarish bir xil narsa emas. Agar hayotingizni o‘zgartirmoqchi bo‘lsangiz, odatlaringizni o‘zgartiring. Buni kichik o‘zgarishlar bilan boshlang.

1. Darhol javob berishga shoshilmang

Ha, dunyo tezlashmoqda, ammo bu siz doimo savol va takliflarga zudlik bilan javob berishingiz kerak degani emas. Hamma narsaga avtomatik ravishda rozi bo‘lmang. So‘z boyligingizga “Men sizga xabar beraman” va “Keyinroq javob beraman” iboralarini qo‘shing.

Kech bo‘lganda sizga kerak emasligini tushungandan ko‘ra, biroz o‘ylab ko‘rgan ma’qul. Bu  bilan vaqtingizni tejaysiz, o‘zingizni keraksiz umidsizliklardan qutqarasiz.

2. Hech bo‘lmaganda bitta ishni yakuniga yetkazing, garchi bu o‘zingizga yoqmasa ham

Har kuni bajarishni istamaydigan bitta kichik vazifani tanlang va uni bajarishga o‘zingizni majburlang. Bu turlicha bo‘lishi mumkin: taomga buyurtma berish o‘rniga idishlarni yuving, yuguring yoki uyda kechki ovqat tayyorlang.

Bir necha kundan so‘ng muammo aniq bir holatda emasligini sezasiz. Ehtimol, siz noqulaylik tug‘diradigan narsalarni kechiktirishga odatlangansiz.

Va siz birinchi qadamni qo‘yishning o‘zi kifoya ekanligini, bundan keyin hamma narsani oxirigacha yetkazish qiyin emasligiga guvoh bo‘lasiz. Mayda vazifalarni o‘zlashtirganingizdan so‘ng, kattaroq ishlarga o‘ting.

3. Haftada bir kunni ijtimoiy tarmoqlarsiz o'tkazing

Biz telefonga shunchalik ko‘nikib qolganmizki, u allaqachon qo‘lning tabiiy kengaytmasi kabi ko‘rinadi. Va biz ko‘pincha zerikkan, qayg‘uli yoki o‘zimizni noqulay his qilganda to‘g‘ri ijtimoiy tarmoqlarga yo‘l olamiz. Oqibatda ko‘p vaqtimizni behuda sarflaymiz.

Ijtimoiy tarmoqlardan butunlay voz kechishingiz shart emas. Asosiysi, ulardan me’yorida foydalanish. Haftada bir kun, masalan, yakshanba kuni ularsiz yurishga harakat qiling. Sayr qiling, sevimli mashg‘ulotingiz yoki boshqa qiziqarli narsalarni bajaring. Shunda ijtimoiy tarmoqlarsiz ham nimadir qilish mumkinligini sezasiz. Shunday qilib asta-sekin boshqa kunlarda ularga kirish ehtimoli kamroq bo‘ladi.

4. Ertangi kunga oldindan tayyorlaning

Oldindan reja tuzsangiz, ishni tezroq bajarishingiz mumkin. Bunda hech qanday sehr yo sir yo‘q, faqat mantiq ish beradi.

 

Kechqurun nima kiyishni hal qiling va sumkangizni yig‘ing. Vazifalar ro‘yxatini tuzing, uchrashuvlar va eslatmalar uchun taqvimingizni tekshiring. Keyingi kuningizni osonlashtirish uchun hamma narsani oldindan tayyorlang. Uyga qaytgan zahoti yoki uxlashdan oldin buni bajarishni o‘zingizga mashq qildiring.

5. Chalg‘imasdan ovqatlaning

Biz ovqatlanayotganda va ishlaganimizda, o‘qiganimizda yoki televizor tomosha qilganimizda ko‘proq nimadir yeb qo‘yamiz. Shu bilan birga ovqatning ta’mini deyarli sezmaymiz, chunki bizni boshqa masala-yumushlar chalg‘itadi.

Boshqa harakatlardan holi ravishda ovqatlanishga odatlaning. Ehtimol, siz shunchaki telefoningizni qo‘lga olmoqchi yoki biror bir serialni yopishga ehtiyoj sezasiz. Taslim bo‘lmang.

6. Ish vazifalarini bajarishda taymerdan foydalaning

“Pomodoro” usulini haqli ravishda “mahsuldorlik Injili” deb atash mumkin. “Pomodoro” taymeri diqqatni jamlashga yordam beradi, qisqa tanaffuslar esa dam olish va quvvatlanish imkonini beradi. Standart intervallardan boshlang: 25 daqiqa ish va 5 daqiqa dam oling, so‘ngra o‘zingizga mos keladigan ritmni toping.

7. Kechasi telefoningizni boshqa xonada qoldiring

Agar u karavotning shundoq yonida bo‘lsa, “budilnik”ni o‘chirib, yana uxlash vasvasasi yuqoriroq bo‘ladi. O‘zingizni bundan asrang.

Agar telefon uzoqda bo‘lsa, uni o‘chirish uchun o‘rningizdan turishingiz kerak bo‘ladi. Va shu oraliqda siz bugun qancha ish qilish kerakligini eslaysiz, ochlik yoki chanqoqlik his qilasiz. Har holda, kunni boshlash osonroq bo‘ladi.

8. Biror narsani yoqtirganingiz zahoti sotib olmang

Ikki qoidaga amal qiling. Birinchidan, agar sizga buyum yoqsa, xarid qilishni bir necha kunga kechiktiring. Agar bu vaqt ichida sizga haqiqatan ham kerak bo‘lib tuyulsa, do‘konga qayting. Tabiiyki, biz uzoq vaqtdan beri qidirayotgan narsangiz haqida gapirmayapmiz.

Ikkinchidan, qiymati tushirilgan “rasprodaja”dan ham mahsulot sotib olishga shoshilmang. Marketologlar bizning miyamiz qanday ishlashini va ajoyib shartlarda sotib olish biz uchun qanchalik yoqimli ekanligini yaxshi bilishadi. Haddan tashqari xarid qilmaslik uchun o‘zingizdan so‘rang: “Men shuning uchun to‘liq narxni to‘laymanmi?” Agar javob yo‘q bo‘lsa, yo‘lingizda davom eting.

9. Barcha fikrlaringizni yozing

Ular eng kutilmagan joyda xayolga keladi va biz ularni eslab qoladiganga o‘xshaymiz. Ammo, odatda, ular tez orada ongimizdan chiqib ketadi. Shunda nima qilishni xohlayotganimizni yoki ishda qanday yangi yondashuvni sinab ko‘rishni o‘ylayotganimizni eslashga qiynalamiz. Bunga yo‘l qo‘ymaslik uchun o‘zingizni barcha fikrlarni, hatto ahamiyatsiz bo‘lib ko‘rinadigan g‘oyalarni ham yozishga o‘rgating.

Mavzuga doir:

• Ertaga o‘zingizni yaxshiroq his qilish uchun bugundan amal qilishni boshlash kerak bo‘lgan tavsiyalar
• Nimaga har kuni bir xil vaqtda uxlashga odatlanish kerak?