Stulda egilib o‘tirish, ryukzak taqish va har qanday kishini 10 yoshga kattaroq ko‘rsatadigan boshqa odatlar

Tashqi ko‘rinishni yaxshi saqlash jismoniy salomatlik kafolatidir. Gavdani egmaslik, yelkalarni tik tutish, umurtqa pog‘onasini tekis ushlash, bo‘yinni tik holatda bo‘lishi insonning o‘ziga nisbatan ishonchini oshiradi, stressni kamaytiradi va hatto depressiya belgilarini yengillashtiradi — bu ilmiy jihatdan isbotlangan. Qolaversa, ushbu sanab o‘tilganlarga amal qilish orqali yoshroq ko‘rinish ham oson. Ikki daqiqada 10 yoshga yoshroq ko‘rinishni xohlaysizmi? “Noviy ochag” nashri sanab o‘tgan maslahatlarga amal qilish tavsiya etiladi.

Ish jarayoni o‘tirib ishlashni talab qiladimi? Kreslo yoki ofis stuli gavdaga mos balandlikda ekaniga ishonch hosil qilish lozim: agar hamma narsa to‘g‘ri tanlangan bo‘lsa, odam avtomatik ravishda gavdani tekis tutadi. Ammo biror narsa mos kelmasa, belning pastki qismida zo‘riqish paydo bo‘lishi mumkin. Gavda oldinga cho‘ziladi, yelkalar bukiladi, natijada umurtqa pog‘onasi notekis holatga keladi. Tana bu pozitsiyaga o‘rganib qoladi, vaqt o‘tishi bilan gavda tiklanganda, og‘riq paydo bo‘ladi. Bundan tashqari, haqiqiy yoshga besh yoki hatto o‘n yil qo‘shilishi mumkin.

Telefonni bo‘yin va iyak orasiga qo‘yib gaplashish

Tan olish kerak, bu holat hammaga tanish. Garchi telefon suhbati unchalik uzoq bo‘lmasa, qo‘llar bo‘sh bo‘lsa ham, qachondir telefonni iyak va bo‘yin orasiga qo‘yib gaplashish mumkin. Agar ushbu holat muntazam ravishda takrorlansa, yelka bosh tomonga qiyshayadi, mushak va paylar ham cho‘ziladi. Birinchidan, boshning yelkaga og‘ishi tashqi ko‘rinishga putur yetkazadi. Uzoq muddatda insult xavfi ortadi. Shuning uchun quloqchin sotib olish va undan foydalanish tavsiya etiladi.

Yotoqda yoki divanda yotib ishlash

Ayniqsa, bu masofadan turib ishlaydiganlar uchun tegishli. Ertalab uyg‘onish va tiqilinch transportda ofisga borishning o‘rniga, yotoqda shunchaki kompyuterni ishga tushirish kifoya. Ammo bu haqiqatan ham xavfsizmi? Yotib ishlash jarayonida umurtqa pog‘onasi doimo taranglashadi, yelkalar ko‘tariladi, iyak pastga tushadi va bo‘yin oldinga cho‘ziladi — bu juda zararli odat. Vaqt o‘tishi bilan bu pozitsiya organizm uchun odatiy holga aylanishi mumkin va gavda bukilib qoladi.

Qorin bilan uxlash odati

Uxlash pozitsiyasi sog‘liq, fe’l-atvor va hatto go‘zallik haqida ko‘p narsalarni ma’lum qilishi mumkin. Shifokorlarning ogohlantirishicha, umurtqa pog‘onasi uchun eng xavfli uyqu holati qorin bilan yotishdir. Bo‘yin va yelka mushaklarining doimiy zo‘riqishi tufayli ular yallig‘lanishi mumkin, boshni burish qiyin bo‘ladi. Iloji bo‘lsa, yon tomonga qarab uxlash va sifatli matras tanlash tavsiya etiladi.

Ryukzak taqish

Ryukzak haqiqatan ham bel uchun eng xavfsiz aksessuardir, lekin undan to‘g‘ri foydalanilsagina. Ryukzak tasmalari juda uzun bo‘lmasligi kerak, ular bir xil uzunlikda bo‘lishi uchun aniq o‘rnatilishi, og‘irlik butun orqa tomonga, yelkadan belga qarab taqsimlanishi kerak. Agar yuqoridan sanab o‘tilgan talablar to‘g‘ri bajarilmasa, gavdaning barcha qismiga og‘irlik tushadi va natijada umurtqa pog‘onasi qiyshayadi, yelkalar oldinga cho‘ziladi, harakatlanish qiyinlashadi.