Овқатдан кейин кўнгил айниши турли сабабларга кўра пайдо бўлади. Кўпинча бу овқат ҳазм қилиш органлари фаолияти бузилишининг биринчи сигналидир. Қуйида нима учун овқатдан кейин кўнгил айниши кузатилиши ва нохуш ҳолат билан курашиш усуллари ҳақида билиб оласиз.
Овқатдан кейин кўнгил айниш сабаблари
Нега овқатдан кейин ўзингизни ёмон ҳис қиласиз? Кўпинча бу овқат ҳазм қилиш тизими касалликларининг белгиси, аммо бошқа омиллар ҳам бу нохуш ҳолатга олиб келади.
Сабабларни икки гуруҳга ажратиш мумкин:
- Соғлом одамда ривожланадиган кўнгил айниши
Нотўғри овқатланиш туфайли ривожланиши мумкин. Буни қуйидагилар кучайтиради:
- Меъёрдан кўп овқатланиш;
- Қизариб пишган ва ёғли овқатларни кўп истеъмол қилиш;
- Овқатдан сўнг дарҳол бажариладиган фаол ҳаракатлар, жисмоний фаолият;
- Сифатсиз маҳсулотлардан ейиш;
Бундай ҳолларда нохуш аломатлардан халос бўлиш учун овқатланиш хатти-ҳаракатларини тартибга солиш ёки токсик моддаларни қабул қилишни тўхтатиш кифоя.
- Турли касалликлар туфайли кўнгил айниши
Диетани тартибга солиш кутилган натижани бермаса, овқатдан кейин кўнгил айниши сақланиб қолса, бу қуйидаги касалликларнинг ривожланиши учун сигнал бўлиши мумкин:
- Эзофагит (қизилўнгач касаллиги);
- Гастрит;
- Ингичка ичакнинг яллиғланиши;
- Гепатит;
- Панкреатит
- Холелитиёз;
- Холесистит;
- Ошқозон яраси;
- Ичак дисбактериози.
Ушбу хасталикларда шифокор кўрсатмаси талаб этилади, улар билан мустақил курашиш нафақат самарасиз, балки хавфли ҳамдир.
- Соғлом аёлда овқатдан кейин кўнгил айнишининг сабаби ҳомиладорлик бўлиши мумкин
Фото: “Yandex”
Кунига 2 мартагача кўнгил айниши ва қайт қилиш ҳомиладорликнинг одатий белгиси. Борди-ю кўнгил айниши ёки қайт қилиш тез-тез содир бўлса, бу тиббий назоратни талаб қиладиган токсикоз бўлиши мумкин.
АҚШ Миллий Соғлиқни сақлаш институти олимлари эрталаб кўнгил айнишдан шикоят қиладиган ҳомиладор аёлларда ҳомила тушиш эҳтимоли камроқ эканлигини исбот қилувчи бир қатор кашфиётлар қилишди. Хуллас, олимларнинг таъкидлашича, кўнгил айниши ҳомиланинг тушиш хавфини қарийб олтмиш фоизга, қусиш эса саксон фоизга камайтиради.
Овқатдан кейин кўнгил айнишини ҳис қилсангиз нима қилиш керак?
Даставвал, унинг пайдо бўлишига ёрдам берадиган омилларни истисно қилиш керак, хусусан:
- Кам-кам, тез-тез овқатланинг;
- Овқатдан кейин оғир жисмоний зўриқишлардан сақланинг (фақат пиёда юриш тавсия этилади)
- Ёғли овқатлар миқдорини камайтиринг;
- Буғда пиширилган, қайнатилган, димланган таомларга устунлик беринг;
- Озиқ-овқат маҳсулотларнинг яроқлилик муддатини диққат билан текширинг;
- Алкоголли ичимликлар ва тамаки истеъмолини чекланг;
- Ҳайз муддати кечикаётган бўлса, ҳомиладорлик тестини ўтказиб кўришни унутманг.
Эксперт фикри
Кўнгил айнишининг сабабларидан бири холесиститдир, деб таъкидлайди диетолог Юлия Бобейка. Ўт пуфаги — бу жигар ҳужайралари томонидан ишлаб чиқарилган концентрланган сафро захирасидир. У жуда кўп муҳим функцияларни бажаради: овқат ҳазм қилишда ва ёғ сўрилишида иштирок этади, ошқозон ости бези ферментларининг фаоллигини оширади, шунингдек, антибактериал воситадир. Аммо шундай бўладики, ўт пуфаги яллиғланади ва холесистит ривожланади.
Унинг асосий белгилари ёғли овқатлардан сўнг кўнгил айниш (ёғли бўлиши ҳам шарт эмас. Баъзан бирор нима ейишнинг ўзи кифоя қилади, масалан, ёнғоқ), ўт пуфаги жойлашган қовурғанинг ўнг томонида оғриқ, қичишиш, оғизда аччиқ таъм ва иситма кузатилади. Оғриқ бир маромда кечиши ёки ўнг қўл, ўнг елкада ҳам кучайиши мумкин.
Холесиститнинг ривожланиш сабаблари кучли жисмоний зўриқиш, стресс, ортиқча овқатланишдир. Муаммони аниқлаш учун қорин бўшлиғини ултратовуш текшируви ва қон таҳлилини ўтказиш буюрилади.
Мавзуга доир:
Изоҳ (0)