Тунда яхши ухлай олмаслик ёқимсиз ҳолат, аммо жиддий хавф эмас. Бироқ уйқу билан боғлиқ муаммолар бир ҳафтадан кўпроқ давом этса, такрорий равишда кузатилса, бу тиббий кўриклардан ўтиш кераклигини билдиради. Қуйида уйқусизлик қандай хавфли касалликларни огоҳлантириши мумкинлиги ҳақида билиб олинг.
Юрак хасталиклари
Америка Кардиология коллежи маълумотларига кўра, юрак хасталиги билан оғриган одамларнинг 44 фоизи уйқу муаммоларига дуч келади. Шифокорларнинг буни кун давомида қўл-оёқларнинг қуйи қисмларида тўпланган суюқликнинг кечаси яна бутун организм бўйлаб тарқалиши билан боғлайдилар. Ҳар қандай ҳолатда ҳам мунтазам равишда уйқусизликка дуч келсангиз, кечаси тез-тез уйғонсангиз, шифокорга учранг, ЭКГ ҳамда юракнинг ултратовуш текширувидан ўтинг.
Қалқонсимон без касаллиги
Гипертериоз — қалқонсимон безнинг ҳаддан ташқари фаол бўлган ҳолати, организмдаги метаболик функцияларни тезлаштиради. Бу одамда хавотирланиш, асабийлашиш, шунингдек, энергияни оширади. Шу сабаб кечаси осуда дам ололмайсиз. Қалқонсимон без дисфункциясининг бошқа аломатларини сезсангиз, эндокринолог қабулига ёзилинг.
Артрит
Артрит билан оғриган беморларнинг 80 фоизи уйқу муаммоларига дуч келишади. Гап фақат оғриқ ҳақида эмас: артрит организмда яллиғланиш жараёни бошланишига, бу эса кўпинча ташвишнинг икки ҳисса кучайишига сабаб бўлади. Тун бўйи ухлолмай, фикрларингиз тарқоқ, қайғуриш, хавотир ҳислари билан тонг оттирсангиз, нафақат тинчлантирувчи дорилар, балки артрит бўйича мутахассис маслаҳати ҳам керак.
Аллергия
Аллергиянинг у ёки бу шакли кечаси туннинг осуда ўтишига тўсқинлик қилади. Бу биринчи навбатда, бурун йўлларидаги майда қон томирларнинг кенгайиши натижасида бурун битишига сабаб бўлиб, уйқуга тўсқинлик қилади. Шамоллаш ёки грипп билан оғримаганингизга ишончингиз комил бўлса-ю, йўтал, кўз ёшланиши, бурундан сув оқиши кузатилса, аллергологга учранг.
Гормонал ўзгаришлар
Климакс даври ўртача 51 ёшдан бошланади, аммо гормонал даражадаги ўзгаришлар туфайли уйқу бузилиши бир неча йил олдин пайдо бўлиши мумкин. Гап шундаки, климаксдан аввал осуда уйқуни таъминлайдиган прогестерон гормони ишлаб чиқариш доимий равишда камаяди. Бу давр сиздан узоқ бўлса ҳам, уйқу муаммолари билан курашаётган бўлсангиз, гинеколог-эндокринолог қабулига боринг. Шифокор жинсий гормонларни таҳлил қилиш учун қон топширишга кўрсатма бериши эҳтимолдан ҳоли эмас Баъзан тунги уйқунинг бузилиши поликистик тухумдон синдроми (эндокринологик касаллик)нинг ривожланаётгани ҳақида огоҳлантириши мумкин.
Паркинсон касаллиги ва Алсгеймер синдроми
Тунги уйқудаги безовталиклар Паркинсон касаллиги ёки Алсгеймер касаллиги каби ёшга боғлиқ когнитив касалликларнинг дастлабки белгиси бўлиши мумкин. Ухлаб қолиш қийинлиги, тунги уйғониб кетишлар, қўрқинчли тушлар — буларнинг барчаси невролог билан боғланиш ва марказий асаб тизимининг ҳолатини текшириш учун сабабдир.
Депрессия
Уйқусизлик депрессиянинг доимий ҳамроҳи бўлиб, бу касаллик ташхиси қўйилганларнинг тўртдан уч қисмига таъсир қилади. Бундан ташқари, депрессия ҳам уйқу бузилишига, ҳам тунги дам олишнинг етишмаслигига олиб келиши мумкин. Яхши ухлай олмаслик, қувват етишмаслиги, ҳолсизлик кузатилганда психолог ёки шифокорга ҳолатингизни баён қилинг.
Мавзуга доир:
Изоҳ (0)