Шавкат Мирзиёев Туркия жануби-шарқий қисмидаги вилоятларда юз берган кучли зилзила муносабати билан Ражаб Тоййиб Эрдўғонга ҳамдардлик йўллади.
Президент матбуот котибининг маълум қилишича, давлат раҳбари зилзила оқибатида кўплаб одам қурбон бўлгани ва жиддий жароҳат олгани, катта талафотлар кўрилгани муносабати билан Туркия етакчиси ва халқига чуқур таъзия изҳор этди. Вафот этганларнинг оила аъзолари ва яқинларига ҳамдардлик билдирди, жабрланганлар тез фурсатда соғайиб кетишини тилади.
6 январь куни эрталаб Туркиянинг жануби-шарқий вилоятларида, шунингдек, Сурия шимолида зилзила содир бўлганди. Туркияда 76 киши, Сурияда қарийб 100 киши ҳалок бўлди. Кўплаб бинолар вайрон бўлди.
Ўзбекистон ТИВ матбуот хизмати берган маълумотга кўра, 6 февраль Тошкент вақти билан соат 11:00 ҳолатига кўра, Ўзбекистоннинг Туркиядаги дипломатик ваколатхоналарига зилзила оқибатида ҳалок бўлган ва жароҳатланган Ўзбекистон фуқаролари бўйича маълумот келиб тушмаган.
Ўзбекистоннинг Анқарадаги элчихонаси ва Истанбулдаги бош консуллиги Туркия ҳукумати, шу жумладан, ТИВ ҳузурида ташкил этилган оператив штаб билан доимий мулоқотда бўлиб турибди.
Изоҳ (0)