Қашқадарёда банк мансабдорлари қарийб 4 млрд сўмни ўзлаштирганликда гумонланмоқда

“Agrobank” АТБ Қашқадарё вилоят бошқармаси Қамаши филиали мансабдор шахслари жиноий тил бириктириб, ўзига ишониб топширилган маблағларни ўзлаштириш ва растрата қилиш йўли билан талон-торож қилган, деб хабар бермоқда вилоят прокуратураси матбуот хизмати.

Бош прокуратура матбуот хизматининг “Дарё” сўровига кўра аниқлик киритишича, улар 4 миллиард сўмга яқин ўзлаштирганликда гумонланмоқда.

Мазкур ҳолат юзасидан Иқтисодий жиноятларга қарши курашиш департаменти Қашқадарё вилоят бошқармаси томонидан Жиноят кодексининг 167 (ўзлаштириш ёки растрата йўли билан талон-торож қилиш) ва 209-моддалари (мансаб сохтакорлиги) билан жиноят иши қўзғатилиб, дастлабки тергов ҳаракатлари вилоят прокуратураси томонидан олиб борилмоқда.

Тергов давомида 3 нафар мансабдор шахсга нисбатан “қамоққа олиш” тарзидаги эҳтиёт чораси қўлланган.

Терговнинг бориши алоҳида назоратга олинган.