АҚШ Украинага илк бор узоқ масофага учадиган ракеталар етказиб беришга тайёрланмоқда — Reuters
АҚШ Украинага 2,2 миллиард долларлик ҳарбий ёрдам пакетини тайёрламоқда, унинг таркибидан илк бор узоқ масофали ракеталар, шунингдек, бошқа ўқ-дори ва қуроллар жой олади, деб хабар берди Reuters ўз манбаларига таяниб.
Кейинроқ агентлик аниқлик киритишича, гап150 км масофага уча оладиган GLSDB (Ground Launched Small Diameter Bomb) ракеталари ҳақида кетмоқда. Бу қуроллар Boeing ва Sааb Group томонидан ишлаб чиқарилган, улар М270 ва HIMARS каби ёппасига ўт очувчи реактив тизимлардан учирилади.
Россиянинг Украинадаги босқини бошлангандан бери АҚШ Киевга хавфсизлик учун 26,7 миллиард долларлик ёрдам берди. Июнь ойидан бери Қўшма Штатлар Украина кучларини 20 та HIMARS тизимлари ва ўқ-дорилар билан таъминлади. HIMARS учун Украинага 80 километргача масофадаги нишонларга зарба бера оладиган ва сунъий йўлдош орқали бошқариладиган GMLRS ракеталари етказиб берилмоқда.
Эслатиб ўтамиз, 25 январь куни АҚШ ҳукумати Киевга 31 та М1 Abrams оғир танкларини топширишини маълум қилганди. Ўз навбатида, Германия ҳукумати ҳам Украинага Германия қуролли кучлари захирасидан 14 та Леопард 2 танкини жўнатиши ва бошқа давлатларга реекспорт учун рухсат беришини тасдиқлади. Шу куни Норвегия ва Словакия Мудофаа вазирлиги ҳам танкларни Украинага ўтказиш нияти борлигини маълум қилди. Аввалроқ Киевни танклар билан таъминлаш қарори Буюк Британия, Франция ва Польша расмийлари томонидан эълон қилинганди.
Ғарб давлатлари Киевга танклар етказиб берилиши ҳақида эълон қилгач, Украина президенти Владимир Зеленский мамлакат улардан узоқ масофага учувчи ракеталар ва жанговар самолётлар олишни ҳам кутаётганини айтди. Politico нашри хабар беришича, Ғарб ҳарбий амалдорлари Украинага қирувчи самолётлар етказиб бериш масаласини муҳокама қилмоқда.
31 январь куни АҚШ президент Жо Байден АҚШ Украинага Ф-16 қирувчиларини етказиб бермаслигини айтди. Оқ уй Байденнинг сўзларини АҚШ шусиз ҳам Украина армияси учун жуда муҳим бўлган катта миқдордаги қуролларни етказиб бераётгани билан изоҳлади.
