Украинада ОТМларнинг барчасида рус тилида гаплашишни тақиқлаш таклиф қилинди
Рус тилида шахслараро мулоқотни тақиқлаш Украинанинг барча университетларига татбиқ этилиши керак, деди Украинадаги давлат тилини ҳимоя қилиш комиссари Тарас Кремен. Бу ҳақда “ТАСС” Украинанинг “Рада” агентлигига таяниб, хабар берди.
Кремен Киев-Могила академиясида рус тилида гаплашиш тақиқлангани ҳақида 27 январь куни жорий этилган қоидага шундай изоҳ берди.
“Мен бу қарорни қўллаб-қувватлайман ва ҳар бир университет Украинанинг ҳақиқий ватанпарвар, иродали, билимли фуқароларини тарбиялаш учун энг яхши имкониятларни яратиши керак, деб ҳисоблайман”, — деди Кремен.
Унинг фикрича, таълим соҳаси миллий манфаатларни ҳимоя қилиш масалаларида намуна бўлиши керак. Кремен таъкидлаганидек, “Украин тилининг давлат тили сифатида амал қилишини таъминлаш тўғрисида”ги Украина қонунининг 21-моддасига мувофиқ ўқув жараёнлари давлат тилида олиб борилиши керак.
2022 йил 21 октябрь куни Украина Миллий хавфсизлик ва мудофаа кенгаши раҳбари Алексей Данилов Украинадан рус тили “бутунлай йўқ бўлиб кетиши” кераклигини айтиб, уни “душманлик пропагандасининг элементи” деб атаганди. 11 ноябрь куни Киевдаги болалар боғчалари ва мактаблари ўқув режаларидан рус тили олиб ташланди. Бундай қарор шаҳар кенгаши депутатлари томонидан қабул қилинган.
Кремен айтаётган қонун 2019 йилда кучга кирган. У бошқа тилларга нисбатан украин тилига эксклюзив ҳуқуқлар берди ва ҳаётнинг кўплаб соҳаларида ундан фойдаланишни назорат қилиш механизмларини жорий этди. Қонун, шунингдек, нодавлат тиллар доирасини кескин қисқартирган: миллий каналлардаги дастурларнинг 90 фоизи украин тилида эфирга узатилиши керак, оммавий ахборот воситаларининг фақат рус тилида ишлаши тақиқланган — уларга украин тилидаги версияни юритиш мажбурий қилинган.
