Россиянинг Краснодар ўлкасида аниқланган “Вагнер” қабристони кенгаймоқда. Икки ой ичида қабрлар сони етти баробар ошди, дея хабар берди The New York Times.
Нашр журналистлари 24 январь кунги сунъий йўлдош суратларига асосланиб, қабристонда аллақачон 170 та қабр борлигини аниқлади. Бундан ташқари, яна юзлаб ёлланма аскарларнинг жасади яқин атрофдаги ибодатхонада жойлашгани қайд этилди.
Молкино қишлоғида қабристон борлиги ҳақида илк бор декабрь ойида Россия ҳарбий-ҳаво кучларининг собиқ зобити Vitaлий Вотановский хабар берганди. “Вагнер” асосчи Евгений Пригожин қабристон ёлланма аскарларни дафн қилишга мўлжалланганини тасдиқлаган. Вотановскийнинг сўзларига кўра, қабристонда кимсасиз ёлланма аскарларнинг жасадлари кўмилган. Маҳаллий аҳоли уларнинг кўпчилиги ёқиб юборилганини айтмоқда.
Журналистлар Пригожиннинг қабристондан бир неча километр узоқликда жойлашган Вагнер ибодатхонасига ташрифи видеосини ҳам таҳлил қилган. Бу ерда куйдирилган қолдиқларни дафн қилиш учун хос қора деворлар қаторлари мавжуд. Нашр деворларнинг умумий сони 21 та экани, уларнинг ҳар бирида 42 та қатор борлигини айтди, яъни черковда юзлаб одамлар дафн этилган бўлиши мумкин.
Украинага қарши урушда “Вагнер”нинг ҳаракатлари
“Вагнер” гуруҳи ёлланма аскарлардан иборат бўлиб, уруш ўчоқларида қатнашади. Масалан, улар Бахмут қалъаси учун жангларда, шунингдек Соледарда қайд этилган. Ёлланма аскарлар катта йўқотишларга дуч келмоқда, шунинг учун улар ўз сафларига маҳбусларни жалб қила бошлаган.
Евгений Пригожиннинг шахсий армияси Украинадаги урушда 40 мингга яқин ёлланган маҳкумларни йўқотгани айтилган. 25 январь ҳолатига кўра, Россия армияси шахсий таркибининг умумий йўқотиши 123 080 кишини ташкил қилади.
Мавзуга доир:
Изоҳ (0)