АҚШ ҳукумати яқин икки йил ичида артиллерия снарядлари ишлаб чиқаришни олти бараварга оширмоқчи. Бу ҳақда The New York Times газетаси армиянинг юқори мартабали мулозимига таяниб хабар берди.
Манбанинг сўзларига кўра, Пентагон снаряд ишлаб чиқаришни 500 фоизга — 14,4 мингтадан 90 мингта ва ундан кўпроққа оширишни режалаштирмоқда. Нашр таъкидлашича, одатий ўқ-дориларни ишлаб чиқариш 1950 йиллардаги “Корея урушидан бери мисли кўрилмаган даражага” келтирилади.
АҚШ Мудофаа вазирлиги раҳбарияти 2022 йил сентябрь ойида Украинага қурол етказиб берилиши муносабати билан артиллерия снарядларини ишлаб чиқариш кўрсаткичларини уч бараварга, 2023 йил январь ойида эса яна икки бараварга оширишга қарор қилди.
Газетада иқтибос келтирилган армия ҳисоботига кўра, АҚШнинг ишлаб чиқаришни кўпайтириш режалари “АҚШ мудофаа саноати базасини қарийб 40 йил ичидаги энг агрессив модернизацияси қилиш” бўйича қадамларнинг бир қисмидир.
Россиянинг Украинага босқини бошланган пайтда можаронинг ҳар икки томони ҳам доимий равишда артиллериядан фойдаланган, бироқ Россиянинг захиралари тугаб қолган ва 2022 йилнинг июнидаёқ Россия Қуролли кучлари ўз артиллерияларининг фаоллигини пасайтирган, деб ёзади Meduza ўзининг уруш ҳақидаги шарҳида.
Артиллерия зарбалари туфайли Россия ва Украина томонлари энг катта жанговар йўқотишларга дучор бўлган, АҚШ расмийларига кўра, ҳар икки томон 100 минг одамидан айрилган, дейилади NYT мақоласида.
Уруш пайтида АҚШ ва Ғарб давлатлари Украинага топширган 155 миллиметрли гаубицаларнинг учдан бир қисми ишдан чиққан ва таъмирга муҳтож бўлиб қолган, дея қўшимча қилди NYT.