Украина Қуролли кучлари бош қўмондони ўзига қолдирилган 1 млн долларни армияга хайрия қилди

Украина Қуролли кучлари Олий бош қўмондони Валерий Залужний асли украин бўлган америкалик Григорий Степанецдан 1 миллион доллар мерос олди, сўнг бу пулларни Украина армияси эҳтиёжларига сарфлаш учун хайрия қилди. Бу ҳақда Украина Мудофаа вазирлиги матбуот хизмати ва Степанецнинг оиласига таяниб, The New York Times (NYT) хабар бермоқда.

Газетанинг ёзишича, хайрия январь ойида амалга оширилган. NYT Залужний марҳумни қаердан таниши ёки у билан қандай қариндошлиги ҳақида аниқ маълумот бермаган.

DignityMemorial портали маълумотларига кўра, Грегори Степанец исмли америкалик 24 октябрь куни Вашингтон штатида 85 ёшида вафот этган.

Жами ҳисобда, ўтган йил давомида жисмоний шахслар ва корхоналар Украина Қуролли кучларига қарийб 500 миллион доллар хайрия қилди, бу Украинага инсонпарварлик ёрдами учун ажратилган хайрия миқдоридан сезиларли даражада яъни 20 миллион долларга кўп. “Суспилне” сўровига кўра, барча украиналикларнинг тўртдан бир қисми (24 фоиз) можаро пайтида ўз армияси эҳтиёжлари учун маблағ ажратган. Хусусан, ресторанларда ташриф буюрувчиларга ҳисобни тўлаш пайтида ҳарбийлар учун оз миқдорда хайрия қилиш таклиф қилинади.

NYT шунингдек, ноҳукумат ташкилотлар, хусусан, Come Back Alive ҳам маблағ йиғаётганини таъкидлайди. Бу ташкилот 132 миллион доллар тўплашга муваффақ бўлган.