АҚШ Украинага 30 тадан 50 тагача Abrams танкларини топшириш ҳақида эълон қилишни режалаштирмоқда. Танкларни етказиб бериш учун бир йилдан кўпроқ вақт кетиши мумкин. Бу ҳақда ABC телеканали америкалик мансабдорга таяниб хабар берди.
ABC хабарига кўра, АҚШ ҳукумати Abrams танкларини Украинага етказиб бериш масаласида танкни ишлаб чиқарувчи компания билан битим тузмоқчи, шу сабабли, уларни ҳали анча вақт давомида Киевга етказиб беролмаслиги мумкин. АҚШ расмийси Abrams’ларнинг етказилиши бир йилдан кўпроқ вақт олиши мумкинлигини тан олди.
Дастлаб АҚШ Украинага Abrams танкларини етказиб беришдан бош тортганди, чунки логистика ва уларни жанг майдонида сақлаш билан боғлиқ қийинчиликлар бунга имкон бермаслиги айтилган. Аммо, ОАВ хабарларига кўра, Германия Leopard 2 танкларини Украинага топшириш учун АҚШ ҳам Abrams’ларни бериши кераклиги ҳақида шарт қўйган.
24 январь куни Германиянинг Spiegel нашри Германия ҳукумати ниҳоят Украина Қуролли кучларига камида ўнта Leopard 2А6 танкини жўнатишга рози бўлганини хабар қилди. Бу ҳақда расман бугун, 25 январь куни эълон қилиниши керак. 24 январь куни кечқурун Politico АҚШ ҳам Украинага 30 та М1 Abrams танкини жўнатмоқчилиги ҳақида хабар берди. Bloomberg, Reuters ва AP агентликларига кўра, Оқ уй ҳам бугун бу қарорини расман эълон қилади.
Изоҳ (0)