НАТО бош котиби Йенс Столтенберг нима учун Украинага Ғарбда ишлаб чиқарилган танкларни етказиб бериш муҳимлигини тушунтирди. У Германия мудофаа вазири Борис Писториус билан қўшма брифингда бу ҳақда гапирди.
“Жанговар танклар Россия армиясининг ҳужумини қайтариш, Украинага ҳудудини қайтариб олиш, Европада суверен ва мустақил давлат сифатида ғалаба қозонишини таъминлашда муҳим аҳамиятга эга”, — деди у.
НАТО расмийси иттифоқчилар Украинага аллақачон жанговар танклар беришга қарор қилгани ва зирҳли транспорт воситаларини, пиёда жанговар машиналар етказмоқчилигини айтди.
“Оғирроқ ва замонавийроқ қуроллар керак. Иттифоқчилар айнан шундай қуроллар етказиб беришни маълум қилган. Германия Marder пиёда жанговар машиналарини етказиб бериши маълум. АҚШ Bradley ва Stryker зирҳли жанговар машиналари ва бошқа турдаги зирҳли техникалар етказиб бермоқчи. Канада ва бошқа иттифоқчилар ҳам турли зирҳли техникалар, хусусан, жанговар машиналар етказиб беришни кўпайтирмоқда. Франция енгил жанговар танкларни, Буюк Британия эса замонавий Challenger 2 жанговар танкини етказиб бериши маълум бўлди”, — деди Столтенберг.
У мазкур қуроллар Украинанинг жанговар қобилиятига қўшимча ҳисса қўшишини қайд этди.
“Бу шошилинч ва муҳим жараёндир, чунки Россия янги ҳужум тайёрламоқда. Украиналикларга тезда ҳужумларни қайтариш ва ўз ҳудудларини озод қилиш имкониятини яратишимиз керак”, — дейди НАТО бош котиби.
Шунингдек, у Германия вазири билан жанговар танклар масаласини муҳокама қилгани, Иттифоқчилар ўртасидаги маслаҳатлашувлар давом этиши ва тез орада тегишли қарор қабул қилинишини айтди.
Мавзуга доир:
- Польша Украинага Германия танкларисиз ҳам “кичикроқ коалиция” билан ёрдам беришга тайёрлигини маълум қилди
- Зеленский Украинага ҳозир қандай қуроллар кераклигини айтди
- Африка мамлакати биринчи марта Украинага танклар етказиб берди
- Фоторепортаж: Ғарб Украинага қандай қуролларни ваъда қилмоқда?
- Нега Украина Германиядан айнан “Леопард” танкларини сўрамоқда? У қандай аҳамиятга эга?
Изоҳ (0)