Финляндия ташқи ишлар вазири Пекка Ҳаависто мамлакатнинг НАТОга аъзолик аризаси Швециянинг аризасидан алоҳида кўриб чиқилиши мумкинлигини маълум қилди. Аввал Туркия президенти Ражаб Тоййиб Эрдўғон Стокгольмда бўлиб ўтган ислом динига қарши намойишдан сўнг Швециянинг НАТОга киришини қўллаб-қувватлашдан бош тортганди.
Ҳаавистонинг сўзларига кўра, Финляндия ва Швециянинг бир вақтда алянсга кириши бу икки давлат хавфсизлиги учун ҳали ҳам устувор масала. “Агар Швециянинг аризаси узоқроқ муддатга кечиктирилса, Финляндия Швеция билан бир вақтда НАТОга аъзо бўлиш тўғрисидаги аризани қайта кўриб чиқишга мажбур бўлиши мумкин”, — дея қўшимча қилди вазир Yle нашрига берган интервьюсида.
Илгари Ҳаависто ҳарбий нуқтаи назардан Финляндия ва Швециянинг бир вақтда НАТОга аъзо бўлиши муҳимлигини, шу сабаб ўз мамлакати алянсга қўшилиш жараёнини қўшниси билан бирга якунламоқчилигини таъкидлаган эди.
2022 йилнинг май ойида Швеция ва Финляндия НАТОга аъзо бўлиш учун расмий ариза топширган эди. Бунгача ҳар икки давлат ҳарбий бетарафлик сиёсатига амал қилган. Алянсга қўшилиш учун ариза бериш тўғрисидаги қарор Россиянинг Украинадаги босқини фонида қабул қилинган.
Швеция ва Финляндиянинг НАТОга аъзо бўлиши учун алянснинг барча аъзолари уларнинг аризаларини қўллаб-қувватлашлари керак. Иттифоқнинг 30 аъзосидан фақат Венгрия ва Туркия аризаларни ратификация қилмаган. Анқара айни пайтда икки давлатга ўз ҳудудидаги курд гуруҳларини қўллаб-қувватлашни тўхтатиш талабини илгари сурди. Туркия расмийлари, шунингдек, Швециядан “тerrorчиликда гумонланувчиларни” Анқарага экстрадиция қилишни талаб қилди. Кейинчалик Туркия Швеция ва Финляндия ҳали бу талабларни бажармаганини бир неча бор таъкидлади.
Туркия ва Швеция ўртасидаги муносабатлар январь ойида Туркиянинг Швециядаги элчихонаси олдида ултра ўнгчи сиёсатчи томонидан Қуръон китобининг ёқиб юборилиши туфайли кескинлашди.
Изоҳ (0)