Жаҳон соғлиқни сақлаш ташкилоти (ЖССТ) йўтал сироплари билан боғлиқ болалар ўлими ҳолатларидан сўнг хавфли препаратлардан ҳимоя қилиш учун “тезкор ва келишилган чоралар” кўришга чақирди. Бу ҳақда Reuters хабар берди.
Ташкилот ҳолат юзасидан баёнот бериб, 2022 йилда Гамбия, Индонезия ва Ўзбекистонда 300 дан ортиқ бола, асосан, 5 ёшгача бўлганлар, хавфли таркибий қисмга эга дорилар сабабли ўткир буйрак етишмовчилигидан вафот этганини таъкидлади. Мазкур сироп таркибидаги этилен гликол ва/ёки диэтилен гликол болаларнинг ўлимига сабаб бўлган.
“Бу моддалар ишлаб чиқаришда эритувчи ва антифриз сифатида ишлатиладиган заҳарли кимёвий таркиб бўлиб, уларни оз миқдорда бўлса ҳам қўллаш ўлимга олиб келиши мумкин ва ҳеч қачон дори воситалари таркибида бўлмаслиги керак”, — дейилади баёнотда.
Юқоридаги давлатлар қаторида, ЖССТ Филиппин, Шарқий Тимор, Сенегал ва Камбоджада ҳам препаратлардан болалар ўлими кузатилиши эҳтимоли борлиги, сабаби бу давлатларда ҳам йўталга қарши сироплар сотилиши мумкинлигини билдирди. ЖССТ 194 та давлатдан ўлим ҳолатларининг олдини олиш учун чора кўришга чақирди.
Эслатиб ўтамиз, Ўзбекистонда камида 20 нафар бола Ҳиндистонда ишлаб чиқарилган “Док-1 Макс” сиропини истеъмол қилиш ортидан вафот этди. Ҳозирда давлат хавфсизлик хизмати томонидан “Док-1 Макс” препарати билан боғлиқ ҳолат юзасидан жиноят иши қўзғатилган. Ҳиндистон ҳукумати “Док-1 Макс” дорисини ишлаб чиқарган компанияга қарши иш очган. Компаниянинг сироп ишлаб чиқарилиши тўхтатилган. ЖССТ “Док-1 Макс” ва “Амбронол” дорилари ҳақида огоҳлантирган. Ҳиндистон ҳукумати “Док-1 Макс” дорисини ишлаб чиқарувчи компаниянинг лицензиясини тўхтатган.
Изоҳ (0)