Хитой компаниялари Россияга хавфли бўлмаган ҳарбий буюмлар сотган, рус армияси Украинадаги урушда ундан фойдаланмоқда. Бу ҳақда CNN телеканалининг икки манбаси хабар берди.
АҚШ президенти Жо Байден маъмурияти мазкур маълумотга эгалиги ва Пекиннинг ҳаракатларидан хавотирдалиги маълум қилинди. Хитой ўқ ўтказмайдиган жилет ва дубулғаларни сотган, бироқ Москва жиддийроқ ҳарбий ёрдам сўрагани айтилмоқда.
“Вашингтон Россияга ҳарбий техника етказиб берилишидан хавотирда, бироқ Хитой ҳукумати бундан хабардорми ёки ёъқми, ҳозирча номаълум. Давлат корхоналари Хитой иқтисодиётининг асосини ташкил этади, аммо ҳаммаси ҳам доимий назорат остида эмас”, — дейди АҚШ расмийларидан бири.
CNN’нинг иккинчи манбасига кўра, баъзи АҚШ расмийлари Хитой Россияга ҳарбий буюмлар бераётганидан хабардор эканига ишончи комил.
“Хитой расмийлари буни тўхтатиш учун чоралар кўриши керак”, — деди манба.
Байден маъмурияти Пекиннинг Москвани қўллаб-қувватлаши аҳамиятини ўлчаётгани, бу АҚШнинг хавотирини кучайтираётгани таъкидланади. CNN манбалари Байден маъмуриятининг Пекин билан алоқалари ҳақида батафсил маълумот бермаган.
“АҚШ давлат котиби Энтони Блинкен яқин ҳафталарда Хитойга бормоқчи, унда Россияга ҳарбий техника етказиб бериш муҳокама мавзуси бўлади. Агар Байден ҳақиқатан ҳам Россияга Хитой ҳарбий ёрдами етказилгани фактини аниқласа, унга қанчалик қаттиқ жавоб бериш кераклигини ҳал қилиш керак”, — дейди расмийлар.
Таъкидланишича, Россиянинг Украинага бостириб киришининг дастлабки кунида Байденнинг ёрдамчилари Хитойни Россияни қўллаб-қувватлаш оқибатлари ҳақида огоҳлантирган.
“Хитой Москва сўраган молиявий ва ҳарбий ёрдамнинг кўп қисмини кўрсатмади. Пекин Россиядан фарқли ўлароқ, иқтисодий жиҳатдан Ғарб билан жуда чамбарчас боғланган. Хитойликлар жаҳон ҳамжамиятининг ғазабига дуч келмасликка интилмоқда”, — дейди АҚШ разведкаси.
Мавзуга доир: Хитой амалдорлари Путинни “телба” деб атаб, Россиядан узоқлашишга чақирмоқда
Изоҳ (0)