Туркманистон президенти Сердар Бердимуҳамедов 21 январь куни «Туркманистон халқининг миллий етакчиси тўғрисида»ги қонунни имзолади, деб ёзади «Коммерсантъ». Бу қонун бошқа нарсалар билан бир қаторда, Гурбангули Бердимуҳамедов ва унинг оиласи аъзоларини дахлсизлик ҳуқуқи билан таъминлади.
21 январь куни Туркманистон парламентининг қўшма мажлиси бўлиб ўтди. Унда собиқ президент Гурбангули Бердимуҳамедовга миллий етакчи мақомини бириктириш ҳақида қарор қабул қилинди. У, шунингдек, янгидан ташкил қилинган халқ ҳокимиятининг олий органи — Халқ Маслаҳатига раҳбар бўлди. Бунгача Халқ Маслаҳати парламентнинг юқори палатаси ҳисобланарди, қуйи палата — Мажлисдан иборат эди. Қайта ташкил қилинганидан кейин парламент бир палатали бўлди.
«Туркманистон халқи миллий етакчиси ва унинг оиласи аъзолари дахлсизлик ҳуқуқига эга. Дахлсизлик ҳуқуқи унинг мол-мулкига ҳамда оила аъзоларига тегишли мол-мулкка ҳам тааллуқлидир», — дейилади қонунда. Шунингдек, ҳужжатда айтилишича, миллий етакчи ва унинг оиласи давлат томонидан ҳимоя қилинади.
2021 йил январь ойида Туркманистонда қонун чиқарувчи ҳокимият бир палатали парламентдан икки палатали парламентга ўтган эди. Илгари мамлакатнинг ягона ва бир палатали парламенти бўлган Мажлис қуйи палатага, Халқ кенгаши эса юқори палатага айлантирилди.
2022 йил январь ойи ўрталарида эса Гурбангули Бердимуҳамедов мамлакат конституциясига ўзгартиришлар киритиб, Халқ маслаҳатига катта ваколатлар бериш ва бир палатали парламентни қайтариш нияти ҳақида маълум қилди.
Эслатиб ўтамиз, 2022 йил февралда Гурбангули Бердимуҳамедов Туркманистон президенти лавозимини «ёш раҳбар»га топширишини маълум қилган. Бир неча кундан сўнг унинг ўғли Сердар Бердимуҳамедов президентликка номзод сифатида кўрсатилди. У март ойида бўлиб ўтган президентлик сайловларида 72,97 фоиз овоз билан ғалаба қозонди.
Изоҳ (0)