Норвегия Қуролли кучлари қўмондони генерал Эирик Кристофферсен Норвегиянинг ТВ2 телеканалига берган интервьюсида Россиянинг Украинага кенг кўламли босқини давомида 180 мингга яқин рус аскари ҳалок бўлган ёки яраланганини айтди.
Норвегия генералининг сўзларига кўра, Украинанинг урушдаги йўқотишлари «100 мингдан ортиқ қурбон ва ярадор аскарларни ташкил этади». Унинг қайд этишича, яна 30 мингга яқин украиналик тинч аҳоли ҳалок бўлган.
Россия Мудофаа вазирлиги охирги марта 2022 йил сентябрда ўз йўқотишлари ҳақида хабар берганди. Ўша пайтда, Россия мудофаа вазири Сергей Шойгу урушда 5 937 нафар рус қўшини ҳалок бўлганини айтган.
«Медиазона», BBC рус хизмати ва кўнгиллиларнинг аниқлашича, Россияда 17 январгача, очиқ манбаларга кўра, Украинага босқинда қатнашган 11 662 нафар россиялик аскарнинг ўлими тасдиқланган.
Украина Қуролли кучлари Бош штаби 23 январь кунги ҳисоботида Россия босқинида 121 мингдан ортиқ рус аскари ҳалок бўлганини маълум қилди. 2022 йил декабрда Украина президенти офиси уруш бошланганидан бери 10 мингдан 13 минггача украиналик ҳарбий ҳалок бўлганини хабар қилганди.
Изоҳ (0)