Бугун, 23 январь куни бутун Покистон электр токисиз қолди, бунга тизимнинг ишдан чиқиши сабаб бўлди. Бу ҳақда мамлакат Энергетика вазирлиги ўз Twitter’ида маълум қилди.
«Дастлабки маълумотларга кўра, бугун эрталаб 7:34 да Миллий тармоқ тизим частотаси пасайган, натижада энергия тизимида катта кўламли ишдан чиқиш юз берган», — дейилади хабарда.
Ҳукумат аллақачон электр таъминотини қайта тиклаш ишларини бошлаб юборган, Исломобод ва Пешовар электр таъминоти компанияларининг бир қанча электр тармоқ станциялари фаолияти қайта тикланди.
Покистонда ёнилғини тежаш ва харажатларни камайтириш мақсадида қиш мавсумида энергоблоклар тунги вақтда ўчириб қўйилади, деди энергетика вазири Хуррум Дастагир. Унинг аниқлик киритишича, бугун эрталаб улар қайта ёқилганида мамлакат жанубида, Жамшоро ва Даду шаҳарлари оралиғида частоталар ўзгариши қайд этилган.
«Шу сабабли кучланиш тебраниши юз берди ва тизимлар бирин-кетин ўчиб қолди. Бу жиддий инқироз эмас», — дея хулоса қилди Дастагир.
Покистонда худди шундай катта кўламли чироқ ўчиши 2021 йил 9 январдан 10 январга ўтар кечаси ҳам содир бўлганди, ўшанда Исломобод, Карачи, Равалпинди, Лаҳор ва Мўлтон электр токисиз қолганди. Эелектр энергияси 9 январь куни тунда, тахминларга кўра, энергияни тақсимлаш тизимидаги носозликлар туфайли ўчиб қолган.
Изоҳ (0)