Аргентина Россиянинг Украинадаги ҳарбий ҳаракатларини қўллаб-қувватламайди, аксинча музокаралар жараёнини қайта бошлаш тарафдори, лекин Москва билан алоқаларни ҳам рад этмайди. Бу ҳақда Аргентина президенти Альберто Фернандес Бразилия нашрига берган интервьюсида айтди, деб ёзмоқда «РБК».
«Охирги сафар Россия президенти Владимир Путин Аргентинани жаҳон чемпионатидаги ғалаба билан табриклаш учун менга қўнғироқ қилганди ва мен унга бу масалани (Украина билан музокаралар — таҳр.) ҳал қилиш учун музокаралар столига ўтириш кераклигини яна бир бор таъкидладим», — деди Фернандес.
Путин Фернандесга қўнғироқ қилиб, Аргентина терма жамоасини 18 декабрь куни жаҳон чемпионатидаги ғалабаси билан табриклаган.
Аргентина уруш бошланганидан кейин Россияга қарши санкциялар киритмади. Апрель ойида Америка давлатлари ташкилоти кенгаши (АДТК) ҳарбий ҳаракатлар бошлангани сабабли Россияни кенгашда кузатувчи мақомидан маҳрум қилган, бироқ Буэнос-Айрес овоз беришда бетараф қолган эди.
Бундан ташқари Аргентина Бразилия ва Мексика билан бирга АДТКнинг йиллик йиғилишида Россиянинг Украинадаги ҳарбий амалиётини қораловчи резолюцияни қўллаб-қувватламаган.