Turkmaniston prezidenti Serdar Berdimuhamedov 21-yanvar kuni “Turkmaniston xalqining milliy yetakchisi to‘g‘risida”gi qonunni imzoladi, deb yozadi “Kommersant”. Bu qonun boshqa narsalar bilan bir qatorda, Gurbanguli Berdimuhamedov va uning oilasi a’zolarini daxlsizlik huquqi bilan ta’minladi.
21-yanvar kuni Turkmaniston parlamentining qo‘shma majlisi bo‘lib o‘tdi. Unda sobiq prezident Gurbanguli Berdimuhamedovga milliy yetakchi maqomini biriktirish haqida qaror qabul qilindi. U, shuningdek, yangidan tashkil qilingan xalq hokimiyatining oliy organi — Xalq Maslahatiga rahbar bo‘ldi. Bungacha Xalq Maslahati parlamentning yuqori palatasi hisoblanardi, quyi palata — Majlisdan iborat edi. Qayta tashkil qilinganidan keyin parlament bir palatali bo‘ldi.
“Turkmaniston xalqi milliy yetakchisi va uning oilasi a’zolari daxlsizlik huquqiga ega. Daxlsizlik huquqi uning mol-mulkiga hamda oila a’zolariga tegishli mol-mulkka ham taalluqlidir”, — deyiladi qonunda. Shuningdek, hujjatda aytilishicha, milliy yetakchi va uning oilasi davlat tomonidan himoya qilinadi.
2021-yil yanvar oyida Turkmanistonda qonun chiqaruvchi hokimiyat bir palatali parlamentdan ikki palatali parlamentga o‘tgan edi. Ilgari mamlakatning yagona va bir palatali parlamenti bo‘lgan Majlis quyi palataga, Xalq kengashi esa yuqori palataga aylantirildi.
2022-yil yanvar oyi o‘rtalarida esa Gurbanguli Berdimuhamedov mamlakat konstitutsiyasiga o‘zgartirishlar kiritib, Xalq maslahatiga katta vakolatlar berish va bir palatali parlamentni qaytarish niyati haqida ma’lum qildi.
Eslatib o‘tamiz, 2022-yil fevralda Gurbanguli Berdimuhamedov Turkmaniston prezidenti lavozimini “yosh rahbar”ga topshirishini ma’lum qilgan. Bir necha kundan so‘ng uning o‘g‘li Serdar Berdimuhamedov prezidentlikka nomzod sifatida ko‘rsatildi. U mart oyida bo‘lib o‘tgan prezidentlik saylovlarida 72,97 foiz ovoz bilan g‘alaba qozondi.
Izoh (0)