Украина президенти Владимир Зеленский иттифоқчиларини Россия билан уруш пайтида Киевга ёрдам бериш бўйича қарорларни тезлаштиришга чақирди. Бу ҳақда у Давосда бўлиб ўтаётган Жаҳон иқтисодий форумида видеоалоқа орқали гапирди.
Фожиалар ҳаётдан ўзиб кетмоқда. Золимлик демократиядан олдинда. Урушни бошлаш учун Россияга бир сония ҳам керак бўлмади. Аммо унга қарши биринчи санкцияларни жорий қилишда дунёга бир неча кун керак бўлди. Эркин дунё ўйлашга сарфлаган вақтини террорчи давлат ўлдиришга сарфламоқда.Зеленский Украинани ҳаво ҳужумидан мудофаа тизимлари билан таъминлаш Россиянинг навбатдаги ракета ҳужумларидан олдин, Киевга ғарб танкларини бериш Россия зирҳли машиналарининг бостириб киришидан олдин, Украинада тинчликни тиклаш эса Россия бошқа давлатларга ҳужум қилишидан олдин амалга оширилиши кераклигини таъкидлади.2014 йилда Россия ҳеч иккиланмасдан Қримни босиб олганида дунё иккиланди. 2022 йилда Россия иккиланмасдан тўлиқ миқёсли урушга кирганида дунё иккиланди. Дунё бугун ва бошқа ҳеч қачон иккиланмаслиги керак. Ёвузлик қасос олишга интилганда, дунёга қатъият ва тезлик зарур, — деди Зеленский.
Украина раҳбари нутқидан кейинги саволларга жавоб берар экан, Киев вилоятининг Бровари шаҳридаги вертолёт ҳалокатини уруш оқибати деб билишини айтди. «Мен буни бугун мен ва жамиятимиз бошдан кечираётган уруш оқибати деб биламан: бу тасодиф эмас, бу уруш. Уруш нафақат жанг майдонида. Уруш бир неча йўналишда кетмоқда. Буёғига бахтсиз ҳодиса деган нарса йўқ, буларнинг барчаси уруш оқибати», — деди Зеленский.
18 январь куни Бровари шаҳрида фавқулодда давлат хизмати вертолёти қулаб тушди, ҳодиса оқибатида бортдаги Украина ички ишлар вазири Денис Монастирский, унинг ўринбосари ва яна бир нечта амалдорлар ҳалок бўлди. Вертолёт турар жой биноси ва болалар боғчаси ўртасида қулаган, бир неча болалар ҳам ҳалок бўлган.
Изоҳ (0)