Исроил кучлари ишғол қилинган Ғарбий Соҳил жанубида бир нафар фаластинликни отиб ўлдирди. Бу ҳақда Al Jazeera хабар берди.
Фаластин Соғлиқни сақлаш вазирлиги ҳалок бўлган эркак 40 ёшли Ҳамди Абу Дайеҳ эканини аниқлади. У назорат-ўтказиш пунктида жойлашган Исроил кучларига қарши отишма уюштираётганда отиб ўлдирилган. Дайеҳ Фаластин маъмуриятида полициячи бўлиб ишлаган.
Исроил армияси фаластинлик эркак уларнинг аскарларига қарата ўт очганини таъкидлаган. Исроил томонида жабрланганлар қайд этилмаган. Гувоҳлар Абу Дайеҳ ерда ётган пайтда исроиллик ҳарбийлар тез ёрдам машинасининг келишига тўсқинлик қилганини айтган.
Ҳалок бўлган эркак Исроил армияси томонидан «сўнгги 48 соат ичида иккита отишма уюштирганликда» гумон қилинган. Абу Дайеҳ 2023 йил бошидан бери босиб олинган Ғарбий Соҳилда исроиллик қўшинлари томонидан ўлдирилган ўн беш нафар фаластинликдан биридир. Ҳалок бўлганлар орасида тўрт нафар вояга етмаганлар ҳам бор.
Аввалроқ Исроил армияси босиб олинган Шарқий Қуддусдаги қочқинлар лагерига рейд чоғида уйи томида турган фаластинлик эркакни ўлдирганди. Марҳум 41 ёшли Самир Аслан бўлиб, тонг саҳарда қочқинлар лагерида кўкрагидан отиб ўлдирилган. Шунингдек, исроиллик ҳарбийларнинг Ғарбий Соҳилнинг жанубидаги Вифлеем шаҳрига уюштирган рейд чоғида фаластинлик ўсмир ҳалок бўлган.
Изоҳ (0)