Украинадан келган кема саёзликка ўтириб қолиши туфайли Босфор бўғози ёпилди (видео)

Украинадан Туркияга йўл олган қуруқ юк ташувчи кема Босфор бўғозида саёзликка ўтириб қолди. Айни пайтда бўғоз кемалар ҳаракати учун вақтинчалик ёпиб қўйилди, деб хабар беради Туркия қирғоқ хавфсизлиги бош бошқармаси.

142 метрли МКК-1 кемасига қутқарув катерлари ва шатакчи кемалар йўналтирилган.

Қўшма координация маркази маълумотларига кўра, 15 январь куни Украина портларидан 55 тоннадан ортиқ дон ва бошқа озиқ-овқат маҳсулотлари ортилган учта кема чиқиб кетган. 14 январь куни эса Украинадан 32 минг тоннадан зиёд арпа ва кунгабоқар мойи ортилган иккита қуруқ юк ташувчи кема Туркияга қараб йўл олган.

Туркия байроғи остидаги қуруқ юк ташувчи кемалар Россия, Туркия, БМТ ва Украина ўртасида 2022 йил 22 июль куни тузилган дон битими доирасида Украинадан қишлоқ хўжалик маҳсулотларини олиб чиқиб кетмоқда. Дастлаб у 18 ноябргача мўлжалланган эди, кейинроқ эса автоматик равишда яна 120 кунга узайтирилди. Туркия Қишлоқ хўжалиги вазирлигининг 9 январдаги маълумотларига кўра, дон битими амалга оширилишни бошлаганидан буён Украина портларидан 16,9 миллион тонна қишлоқ хўжалик маҳсулотлари олиб кетилган. Шуларнинг 5,4 фоизигина камбағал мамлакатларга етказиб берилган.

Аввалроқ Украина маккажўхориси ортилган қуруқ юк ташийдиган Глорй кемаси Миср шимолидаги Ал-Қантара шаҳри яқинида Сувайш каналида саёзликка ўтириб қолган эди.