Италия полицияси Маттео Мессина Денарони қўлга олди, у Сицилиянинг «Коза ностра» жиноий гуруҳи етакчиларидан бири ҳисобланади. Бу ҳақда ANSA агентлиги ўз манбаларига таяниб хабар бермоқда.
Мафия босси Сицилия вилоятининг Палермо шаҳридаги хусусий клиникада даволанаётган пайтида қўлга олинган. Уни қўлга тушириш бўйича махсус операцияни маҳаллий прокурор мувофиқлаштирган.
Маттео Мессина Денаро 1993 йилдан буён қидирувда бўлган ва Италиянинг энг кўп қидирилаётган мафиозиларидан бири бўлган. У ўнлаб қотилликлар учун сиртдан умрбод қамоқ жазосига ҳукм қилинган. У, шу жумладан, 1992 йилда италиялик терговчилар ва мафияга қарши курашувчилар Жованни Фальконе ва Паоло Борселлинони ўлдиришда қатнашганликда ҳам айбланмоқда. Шунингдек, у 1993 йилда Милан, Флоренция ва Римдаги портлашларга ҳам алоқадор деб ҳисобланилади.
2006 йилда Сицилия мафияси етакчиси Бернардо Провенцано ҳибсга олингач, Мессина Денаро «Коза ностра» етакчиларидан бирига айланган. У қидирув давом эттирилган «биринчи катталикдаги» сўнгги мафиози босси бўлиб қолганди, деб ёзади ANSA.
Агентлик қайд этишича, Мессина Денаро 38 йил давомида адолатдан қочиб юрган Бернардо Провенцанодан бир неча йилга камроқ вақт мобайнида қидирувда бўлиб келган. Сицилия мафиясининг яна бир босси Салваторе Тото Риина эса 23 йил давомида қидирувда бўлганди.
Мавзуга доир:
Изоҳ (0)