Аввалроқ Франция Киевга беришни ваъда қилган АМХ-10 RC ғилдиракли танклари Украинага икки ой ичида етказиб берилади. Бу ҳақда Франция мудофаа вазири украиналик ҳамкасби Алексей Резников билан музокаралар чоғида маълум қилди, деб ёзади «Коммерсантъ».
Франция Украинага Ғарб танкларини етказиб беришни ваъда қилган биринчи мамлакатга айланган эди. Мамлакат президенти Эммануэль Макрон январь бошида Париж Киевга AMX-10 RC енгил танкларини йўналтиришини айтганди.
Франция ортидан Европанинг бошқа давлатлари, шу жумладан, Польша ва Буюк Британия ҳам Украина армиясига оғир танклар етказиб бериши ҳақида эълон қилди. АҚШ ва Германия Киевга Marder жанговар пиёда машиналари ва Patriot зенит-ракета мажмуаларини тақдим этиш ниятини маълум қилди.
Январь бошида Франция президенти Эммануэль Макрон украиналик ҳамкасби Владимир Зеленскийга Франция Украина армиясига AMX-10 RC зирҳли автомобилларини (улар енгил ёки ғилдиракли танклар деб ҳам аталади) етказиб беришини айтган эди.
«Президент AMX-10 RC енгил танкларини етказиб беришга рози бўлиб, Киевга кўрсатилаётган ҳарбий ёрдамни кенгайтиришга қарор қилди. Бу Украина армиясига Ғарбда ишлаб чиқилган танклар етказиб берилиши билан боғлиқ биринчи ҳолатдир», — дея қайд этишди Елисей саройида. Бироқ Украина қуролли кучларига қачон ва нечта AMX-10 RC зирҳли автомобиллари юборилишига аниқлик киритилмади.
Шунингдек, Украина Франциядан Бастион бронетранспортёрларини ҳам олади, деди Зеленскийнинг офиси раҳбари Андрей Ермак. Зеленскийнинг ўзи Макрон билан суҳбат чоғида енгил танклар ва Бастион зирҳли машиналарини етказиб бериш ҳақида гап борганини тасдиқлади. «Раҳмат, дўстим! Сизнинг етакчилигингиз бизнинг ғалабамизни тезлаштирмоқда», — деб ёзди Зеленский Макронга қарата.
AMX-10 RC зирҳли автомобиллари 1981 йилдан буён Франция армияси арсеналида бўлиб келмоқда, уларнинг сони 247 дан ошмайди. AMX-10 RC 105 мм калибрли қуролга эга бўлиб, у икки километр масофада ўт оча олади. Ҳозирги пайтда Франция AMX-10 RC’ни аста-секинлик билан Jaguar зирҳли автомобилларига алмаштирмоқда.
Изоҳ (0)