Россиянинг «Вагнер» хусусий ҳарбий компаниясининг фаолияти АҚШ расмийларини хавотирга солмоқда, шу сабабли Вашингтон уни зарарсизлантиришга ҳаракат қилмоқда. Бу ҳақда Давлат департаменти маслаҳатчиси Дерек Шолле Сербияга ташрифи чоғида маълум қилди, деб хабар беради ABC.
Унинг таъкидлашича, «Вагнер» Сербия ва бошқа мамлакатларда жангчиларни ёллашга интилмоқда, АҚШ расмийлари эса бунга йўл қўймаслик керак, деб ҳисоблайди.
«Сербияда ‘Вагнер’ гуруҳидан хавотирлар бор ёки йўқлигини билмайман, биз ўз ташвишларимиз ҳақида гапирдик ва ҳукумат билан Белградда ҳамда гуруҳ фаол бўлган бошқа жойларда унинг фаолиятини тугатиш бўйича ҳамкорлик қилишни интиқлик билан кутяпмиз», — дея қўшимча қилди Шолле.
Сербия қонунчилиги фуқароларнинг бошқа мамлакатлардаги жанговар ҳаракатларда иштирок этишини тақиқлайди, жазо нафақат жангларда қатнашганлар учун, балки бундай фаолиятни «ёллаган ёки рағбатлантирганлар» учун ҳам назарда тутилган, деб таъкидлайди Сербиянинг Данас газетаси.
Аввалроқ Politico нашри дипломатик ёзишмалардан олинган маълумотларга таяниб, «АҚШ расмийлари ‘Вагнерънинг Украинадан ташқаридаги, жумладан Сербия ва Марказий Африка Республикасидаги ҳаракати ва фаолиятини тобора кўпроқ кузатмоқда», деб ёзганди.
«Вагнер» гуруҳи 2017 йилдан бери АҚШ санкциялари остида.
Изоҳ (0)