2022 йилда Европа Иттифоқи суюлтирилган газнинг (LNG) дунёдаги энг йирик харидорига айланди. Бу ҳақда Refinitiv маълумотларига таяниб Financial Times хабар берди.
Европа Иттифоқи (ЕИ) 101 миллион тонна LNG импорт қилган. Бу 2021 йилга нисбатан 58 фоизга кўп. ЕИнинг жаҳон бозоридаги улуши 24 фоизни ташкил этди.
Европа сотиб олган суюлтирилган газ ҳажми 137 миллиард куб метр табиий газга тенг. Бу ЕИнинг 2021 йилда қувурлар орқали Россиядан олган ҳажми билан деярли бир хил (140 миллиард куб метр).
Аввалги йилларда Европа Иттифоқи Япония ва Хитойга қараганда камроқ LNG сотиб олган эди. Бироқ 2022 йилда Россиядан етказиб бериш камайганидан кейин тезда муқобил излашга тўғри келди.
Хитойда 2022 йилда LNG’га талаб пасайди, чунки қатъий коронавирус сиёсати иқтисодиётни секинлаштирди ва энергияга бўлган талабни камайтирди.
«Агар мамлакат LNG сотиб олишга кўпроқ қизиқиш билдирса, Европа учун таъминот манбаларини топиш қийинроқ бўларди», — деб ҳисоблайди эксперт.
Хитой 2022 йилда жами 64,5 миллион тонна LNG сотиб олган бўлса, 2021 йилда бу кўрсаткич 79 миллион тоннани ташкил этган (дунёда биринчи ўрин). Бундан ташқари, Хитой 2022 йилда ортиқча LNG’нинг бир қисмини Европага йўналтирган.
2022 йил декабрь ойида Хитой COVID’га қарши чекловларни сезиларли даражада енгиллаштирди, бу эса ушбу мамлакатда LNG’га талабнинг ошишига олиб келиши керак.
«Европа эса бундан ҳам кўпроқ газ сотиб олиши керак бўлади, чунки 2023 йилда Россия ёқилғисининг омборларда тўпланган заҳиралари тугайди», — деб ёзади Financial Times.
Қайд этилишича, 2023 йилда LNG бозорида рақобат кучли бўлади ва бу бутун дунё бўйлаб газ нархининг ошишига олиб келиши мумкин.
Мавзуга доир: Россиядан Европа Иттифоқига LNG етказиб бериш ҳажми рекорд даражага кўтарилди
Изоҳ (0)