Rossiya neftiga embargo joriy etilishidan oldin, Yevropa Ittifoqi (YI) mamlakatdan suyultirilgan gaz (LNG) importini oshirdi. Bu haqda ICIS tadqiqot kompaniyasi ma’lumotlariga tayanib Handelsblatt xabar bermoqda.
Nashrning ta’kidlashicha, o‘tgan yilga nisbatan YI va Buyuk Britaniya Rossiyadan deyarli 21 foizga ko‘p LNG sotib olgan.
ICIS gaz eksperti Andreas Shrederga ko‘ra, hozirda Yevropa LNG importining 13 foizi Rossiyadan keladi.
Va bu hajm tez sur’atlarda o‘sib bormoqda, — deb qo‘shimcha qildi Shreder.
Mutaxassisning ta’kidlashicha, Germaniya o‘zining LNG terminaliga ega emas, shuning uchun u Fransiya, Belgiya va Niderlandiya kabi qo‘shni davlatlardan suyultirilgan gaz sotib olishni davom ettirmoqda.
Shrederning so‘zlariga ko‘ra, Rossiyadan LNGning bir qismi ham Germaniyaga yuborilishi kerak bo‘ladi.
Nashrning aniqlik kiritishicha, Yevropa Ittifoqi davlatlari va Buyuk Britaniya Rossiyadan LNGni ancha yuqori narxda sotib olishga majbur.
Shunday qilib, yanvardan noyabrgacha Moskva yoqilg‘i uchun taxminan 27 milliard yevro olishi mumkin.
Shu bilan birga, Rossiyadan odatiy gaz oqimi bir necha oy ichida deyarli to‘liq to‘xtaydi, — deya qo‘shimcha qiladi nashr.
Maqolaga ko‘ra, 2021-yilning yanvaridan noyabrigacha Yevropa davlatlari quvurlar orqali 133 milliard kub metr gaz import qilgan.
Kecha, 5-dekabr kuni Rossiyadan dengiz orqali neft yetkazib berishga qo‘yilgan embargo kuchga kirdi.
Energiya narxlarining yuqori chegarasi Yevropa Ittifoqi davlatlari, G7 va Avstraliya tomonidan ham joriy qilingan: u bir barrel uchun 60 dollar qilib belgilangan. Belgilangan narx darajasidan qimmatroq xomashyoni sug‘urta qilish va tashish taqiqlanadi.
Avvalroq Yaponiya LNG uchun jahonda raqobat kuchayishi haqida ogohlantirayotgani haqida xabar berilgandi.
Izoh (0)