Перуда янги президент Дина Болуарте, бош вазир Альберто Отарола, ички ишлар вазирлари Виктор Рохас ва мудофаа вазири Хорхе Чавесга нисбатан тергов бошланди, деб хабар бермоқда «РБК» мамлакат Бош прокуратурасига таяниб.
«2022 йил декабрь ва 2023 йил январь ойларида бўлиб ўтган намойишлар чоғида геноцид, қотиллик ва оғир тан жароҳати етказиш жиноятлари бўйича дастлабки тергов ҳаракатлари давом эттирилмоқда», — дейилади хабарда.
Бош прокуратура шунингдек, тергов бошланишига мамлакат жануби-шарқидаги Пуно шаҳрида намойишчилар ва ҳуқуқ-тартибот идоралари ўртасидаги тўқнашувда 18 киши қурбон бўлганини маълум қилди. У ерда митинг иштирокчилари Болуартенинг истеъфога чиқиши, янги сайловлар ўтказилишини талаб қилган, деб ёзади La Republica. Нашрнинг қайд этишича, митинглар қурбонларининг умумий сони 40 нафарга яқинлашган.
Бош прокуратура ушбу масала бўйича тергов ҳаракатлари олиб борилаётганини таъкидлади – улар видеокузатув камералари тасвирлари, гувоҳларнинг кўрсатмаларини йиғмоқда; суд-тиббиёт шифокорлари мурдаларни ёриб кўрмоқда.
Перудаги норозилик намойишлари декабрь ойининг биринчи ярмида, ўша пайтдаги президент Педро Кастилё уни коррупция айбловлари туфайли ишдан бўшатмоқчи бўлган парламент йиғилиши олдидан Конгрессни тарқатиб юборгани ва фавқулодда ҳолат эълон қилганидан кейин бошланган. Шунга қарамай, депутатлар давлат раҳбарига импичмент эълон қилишди. Кейинчалик Кастилё исёнда айбланиб, ҳибсга олинган ва 18 ойга қамалган.
Давлат раҳбари лавозимини вице-президент Дина Болуарте эгаллади. У 2024 йилда муддатидан олдин сайловлар ўтказиш ҳамда конституциявий ислоҳотларни таклиф қилди. Аммо уни ҳамма ҳам қўллаб-қувватламади.
Изоҳ (0)