Украинада «махсус ҳарбий операция» бошланганидан бери Чеченистондан 21 мингдан ортиқ жангчи жанговар ҳаракатларда қатнашди, деб маълум қилди республика раҳбари Рамзан Қодиров ўзининг Telegram-каналида.
Қодирув «махсус ҳарбий операция» республика штабининг йиғилишида Чеченистон парламенти раиси ва штаб раҳбари Магомед Даудовнинг ҳисоботини тинглаганини айтди. Ўша ҳисоботда урушда қатнашган чечен жангчиларининг умумий сони қанча экани ва ҳозир уруш зонасида қанча аскар борлиги хабар қилинган.
«Ҳозирги пайтда 9 мингдан ортиқ ҳарбий хизматчиларимиз фронтда. Уларнинг ҳар бири барча зарур кийим-кечак ва қурол-яроғлар билан таъминланган, бу эса самарали жанг қилиш имконини беради», — дейилади Қодиров хабарида.
7 январь куни республика раҳбари уруш зонасига қўшимча кучлар — Росгвардиянинг «Ахмат-1» бўлинмасидан 300 дан ортиқ чечен ОМОН жангчилари юборилганини эълон қилганди.
Изоҳ (0)