2022 йил ноябридан Туркия Украинага кассетали артиллерия ўқ-дорилари — қўш вазифали такомиллаштирилган ўқ-дорилар (ДПИCМ)ни етказишни бошлаган, деб хабар бермоқда Foreign Policy ўз манбаларига таяниб. Ушбу ўқ-дорилар совуқ уруш даврида қўшма ишлаб чиқариш ҳақидаги битим доирасида АҚШда ишлаб чиқилган ва Туркияда ясалган.
Нашр маълумотларига кўра, Украина ҳукумати Вашингтондан ушбу ўқ-дориларни юборишни сўраган. АҚШ ички қонунчилигига мувофиқ ДПИCМъни экспорт қилиш тақиқлангани сабабли Украинага рад жавоби берилган, чунки ушбу ўқ-сориларда нуқсон бўлиш эҳтимоли катта. Foreign Policy манбаларидан бири аниқлик киритишича, Туркия Украина ДПИCМъни олиши мумкин бўлган ягона мамлакат бўлган.
Аввалроқ, 10 январь куни Туркия ташқи ишлар вазири Мавлуд Чавушўғли Анқара Украина президенти Владимир Зеленскийнинг тинчлик формуласини қўллаб-қувватлашини маълум қилди.
Ноябрь ўрталарида Зеленский G20 саммитида видеомурожаат билан чиқиб, ўзининг ўнта шартдан иборат бўлган «тинчлик формуласи»ни таклиф этган эди. Ушбу шартлар радиациявий ва ядровий хавфсизлик; озиқ-овқат хавфсизлиги; энергетика хавфсизлиги; барча асирлар ва депортация қилинганларнинг озод этилиши; БМТ уставининг бажарилиши ҳамда Украина ҳудудий яхлитлиги ва дунё тартибининг қайта тикланиши; Россия қўшинларининг олиб кетилиши ва жанговар ҳаракатларнинг тўхтатилиши; адолатнинг қайтарилиши; экоцид (флора ва фаунанинг йўқ қилиниши)га қарши кураш; эскалацияга йўл қўймаслик; низо якунланганининг мустаҳкамланишини ўз ичига олади.
Аммо Россия ҳукумати Киев билан Украина президенти Владимир Зеленский томонидан таклиф қилинган «тинчлик формуласи» низомлари асосида мулоқот олиб бормоқчи эмас. Украина раҳбариятининг тинчлик бўйича режаси концепциясини Россия ташқи ишлар вазири Сергей Лавров хомхаёл деб тавсифлади.
Кассетали ўқ-дорилар — парвоз чоғида майда ўқ-дорилардан иборат кассетали қисми ажралиб чиқадиган снарядлар. Улар сочилиб кетиб, катта майдонга тушади. Уларнинг алоҳида хавфи шундан иборатки, улар баъзан портламай қолади ва ҳудудга мина сифатида жойлашади; баъзан бу майда бомбаларни болалар топиб олади. Кассетали ўқ-дорилардан фойдаланишни тақиқлаш ҳақидаги конвенция 2010 йилдан буён амал қилади. Уни 100 дан ортиқ мамлакатлар имзолаган. Улар орасида Украина ва Россия йўқ.
Изоҳ (0)