1964—1974 йилларда ҳукмронлик қилган Грециянинг сўнгги қироли Константин II 82 ёшида вафот этди, деб хабар бермоқда Newsбомб портали.
Қайд этилишича, собиқ қирол сўнгги бир ҳафта давомида оғир аҳволда касалхонада ётган. Унинг ёнида рафиқаси Анна-Мария, фарзандлари ва бошқа қариндошлари бўлган. Константин ундан аввалроқ инсультни бошидан кечирган. Прото Тема газетаси маълумотларига кўра, унинг ўлимига полиорган етишмовчилиги сабаб бўлган, бундай ҳолатда организмнинг бир йўла бир нечта тизимларига зарар етади.
Глюксбурглар сулоласи вакили Константин 1940 йил 2 июнь куни туғилган. У қирол Павел I ва қиролича Фредерика Ганновернинг ўғли бўлган.
1964 йилда Константин дастлаб отаси қошида регент бўлган, унинг ўлимидан кейин эса тахтга ўтирган. Newsбомб таъкидлашича, ёш қирол ўз онасининг кучли таъсири остида бўлган.
Константин ҳукмронлиги даврига Грециядаги сиёсий инқироз тўғри келди, кейинроқ у 1967 йилги ҳарбий тўнтаришга айланиб кетди, натижада эса мамлакатда полковниклар хунтаси диктатураси ўрнатилди, унинг етакчиси эса Георгиос Пападопулос эди. Ўша йил охирида Константин хунтага қарши чиқишга уринди, бироқ бу муваффақиятсиз бўлди, натижада у Грецияни тарк этишга мажбур бўлди. Шундан кейин у Италия ва Буюк Британияда яшади.
1974 йилда Туркиянинг Кипрдаги жанговар ҳаракатлари фонида диктатура қулади. Грецияда ўша йилиёқ референдум ўтказилди, унда аҳолининг 69,2 фоизи мамлакатда бошқарувнинг монархия эмас, республика шакли ўрнатилишини ёқлаб овоз берди. Константин халқ хоҳиш-иродасини қабул қилди. 1967 йилда мамлакатни тарк этганидан буён биринчи марта 1981 йилдагина қайтиб келди.
1992 йилда собиқ қирол мол-мулкидан ва Греция фуқаролигидан маҳрум этилди, шундан кейин у Грецияни судга берди. Охир-оқибат ўн йилдан кейин Европа суди Константин фойдасига 13,7 миллион евро ундириб берди, аммо у 161 миллион евро талаб қилганди.
Грециянинг сўнгги қироли Британия қироли Чарльз III нинг ва Россия императори Николай I нинг ўғли Константиннинг қариндоши бўлган. Собиқ қиролнинг рафиқаси Анна-Мария — Дания ҳукмрон қироличаси Маргрете II нинг синглиси. Константиннинг беш нафар фарзанди бор.
Изоҳ (0)