Франциядаги касаба уюшмалари президент Эммануэль Макрон ҳукумати томонидан тақдим этилган пенсия ислоҳоти режасига норозилик сифатида умумий иш ташлаш ўтказишга чақирди, деб ёзмоқда Bloomberg.
Макрон ҳукуматининг ислоҳот режасига кўра, 2030 йилдан бошлаб энг кам пенсия ёши босқичма-босқич 62 ёшдан 64 ёшга кўтарилади. Ҳар йили пенсия ёшини уч ойга ошириш таклиф қилинмоқда. Бош вазир Элизабет Bornнинг айтишича, биринчи босқич 1 сентябрга режалаштирилган. Ҳукумат раҳбари ислоҳотдан кўзланган мақсад пенсия таъминотининг мувозанатли тизимини таъминлаш эканини таъкидлади. Шу билан бирга, у режа французлар орасида «савол ва хавотирлар уйғотаётганини» ҳам тан олди.
«Демократик меҳнат конфедерацияси» (CФДТ) касаба уюшмаси бош котиби Лоран Бергенинг сўзларига кўра, бу ўзгариш, айниқса, фаолиятини эрта бошлаган ишчиларга таъсир қилади. «Пенсия тизими хавф остида эмас, бундай қаттиқ ислоҳотни ҳеч нарса билан оқлаб бўлмайди», — деди у бошқа касаба уюшма ташкилотлари раҳбарлари билан учрашувда. Берге 19 январь умуммиллий иш ташлашнинг биринчи куни бўлишини эълон қилди.
Францияда ҳозирги пенсия ёши 62 ёш, аммо агар фуқаро ўша ёшда нафақага чиқишни танласа, у пенсияни тўлиқ миқдорда олмайди. 2019 йилда француз ҳукумати 2025 йилдан бошлаб тўлиқ пенсия олиш учун камида 64 ёшга тўлгунга қадар ишлаш кераклиги ҳақида лимит белгилаганди. Бундай ҳолда, шахс 1000 евро миқдорида кафолатланган тўловни талаб қилиши мумкин бўлади.
Ўтган баҳорда, президентлик сайловларидан бир неча ҳафта олдин Макрон, агар у қайта сайланса, Францияда пенсия ёши секин-аста 65 ёшга кўтарилишини айтганди. Бу «иш ва вазифаларнинг реаллигини ҳисобга олиш» имконини беради ҳамда кексалар ўртасида ишсизликка қарши курашда ҳам ёрдам беради, деган у.
Изоҳ (0)