Қозоғистон ҳукумати McDonald’s’нинг ёпилишини Россиядан хом ашё етказиб беришдаги муаммолар билан изоҳлади

McDonald’s Россия бизнеси сотилгандан кейин тармоқда юзага келган муаммолар туфайли Қозоғистон бозорини тарк этишга қарор қилганди. 

Қозоғистон Қишлоқ хўжалиги вазирлигининг тушунтиришича, мамлакатдаги ресторанлар шу пайтгача Россияда ишлаб чиқарилган гўшт маҳсулотлари ва ярим тайёр маҳсулотлар билан таъминланган.

«McDonald’s’нинг Россиядан кетиши муносабати билан хом ашё етказиб беришда муаммо юзага келди», — дейилади Қишлоқ хўжалиги вазирлиги баёнотида. 

Расмийларнинг таъкидлашича, Америка компанияси келажакда Қозоғистон маҳсулотларига ўтишга тайёр эди, аммо «маҳаллий ишлаб чиқарувчилар томонидан компаниянинг юқори стандартларини жорий этиш бироз вақт талаб қилди».

Қозоғистон ҳукумати McDonald’s’га ресторанларнинг ёпилишига йўл қўймаслик учун учинчи давлатлардан маҳсулотлар етказиб бериш тартиб-таомилларини тезлаштириш ва соддалаштиришда ёрдам беришга тайёр эди. 

Қозоғистон компаниялари ишлаб чиқаришни Америка компанияси талабларига мослаштириш бўйича ишларни бошлади ва 2023 йил бошида корхоналар аудити ўтказилиши режалаштирилган эди. 

«Бироқ, McDonald’s ёпилганлиги сабабли режалаштирилган аудит амалга оширилмади», — деди Қишлоқ хўжалиги вазирлиги.

McDonald’s 5 январь куни Қозоғистонни тарк этишини эълон қилди. Компания мазкур қарорни «таъминотни қисқартириш» билан изоҳлаган. 

McDonald’s мамлакатда 2016 йилдан бери фаолият юритади, тармоқни маҳаллий Food Solutions компанияси бошқаради. 

Март ойида Қозоғистондаги McDonald’s франшизаси эгаси Қайрат Боранбоев давлат маблағларини ўзлаштиришда айбланиб, ҳибсга олинган эди.