McDonald’s Qozog‘istonni tark etish arafasida, chunki ta’minot zanjiridagi uzilish tufayli mamlakatdagi restoranlar Rossiyadan go‘sht sotib ololmayapti. Bu haqda Bloomberg xabar bermoqda.
Uning manbalariga ko‘ra, McDonald’s Ukrainada urush boshlanishi munosabati bilan Rossiyani tark etishga qaror qilgandan so‘ng, Amerika kompaniyasi qozog‘istonlik franchayziga rossiyalik yetkazib beruvchilardan qiyma sotib olishni taqiqlagan.
2022-yilning noyabrida tarmoqning barcha 24 ta restorani “mahalliy yetkazib berishdagi” cheklovlar tufayli Qozog‘istonda o‘z faoliyatini to‘xtatdi.
Dekabr oyida Qozog‘iston Milliy tadbirkorlar palatasi Atameken mahalliy ishlab chiqaruvchilar o‘z mahsulotlarini McDonald’sga yetkazib berishga tayyorligini ma’lum qildi.
“Kompaniyamiz yirik ish beruvchi bo‘lib, Qozog‘iston bozoriga nisbatan yaqinda kirib kelgan brendni yanada rivojlantirmoqchimiz. Hozirgi geosiyosiy vaziyatlar bizga ta’sir qiladi, chunki biz xalqaro brendmiz.
Shu bois bizning maqsadimiz faoliyatimizni barcha talab va tartiblarga muvofiq davom ettirish va yanada rivojlantirishdir”, — dedi “Food Solutions KZ” (McDonald’s Qozog‘iston) bosh direktori Asset Mashanov.
McDonald’s Qozog‘istonda 2016-yildan boshlab faoliyat yuritgan. 2022-yil bahori holatiga ko‘ra, mamlakatning oltita shahrida 24 ta restoran ochgan.
Bloomberg ma’lumotlariga ko‘ra, sobiq prezident Nursulton Nazarboyevning qarindoshi Qayrat Bo‘ranbayev 2016-yilda Qozog‘istonga fast-fud tarmog‘ini olib kelgan. Bo‘ranbayev “KazRosGaz” sobiq bosh direktori sifatida ham taniqli.
U, shuningdek, Belarusdagi McDonald’s franchayzasiga egalik qilgan va o‘tgan yili ta’minot bilan bog‘liq muammolar tufayli litsenziyasidan mahrum bo‘lgan.
Ta’kidlanishicha, kompaniyaning ayni paytdagi vaziyati Qayrat Bo‘ranboyevning mamlakatda kvazidavlat sektorida katta hajmdagi mablag‘larni o‘zlashtirish ishi bo‘yicha sud qilinayotgani bilan murakkablashmoqda.
Izoh (0)