Tesla самолёт ва қайиқлар учун электр моторлар ишлаб чиқаришни йўлга қўйишни режалаштирмоқда

Tesla Илон Маск бошчилигида янги савдо белгиси учун ариза топширди. Бу ҳақда «Коммерсантъ» хабар бермоқда.

Ўтган ҳафта тақдим этилган ариза компания самолётлар, қайиқлар ва бошқалар учун электр моторлар ишлаб чиқаришни режалаштираётганини кўрсатади.

Tesla — Американинг электромобиллар ишлаб чиқарувчи компанияси. У ўзининг савдо белгисини «ерусти транспорти учун мўлжалланмаган» электр моторларини сотиш учун кенгайтирмоқда.

Бу орқали компаниянинг электр моторлари бренди «самолёт моторлари», «қайиқ моторлари» ва «ўйинчоқ моторлари»га кенгайтирилади.

Ариза топширишда Tesla ҳозирда ушбу тоифалар учун товар белгисидан фойдаланмаётганини, бироқ компания келажакда ундан фойдаланиш ниятида эканини айтади.

Маск узоқ вақтдан бери электросамолёт яратиш ҳақида ўйлаётган эди, у eVTOL самолёт лойиҳаси борлигини билдирди. Бироқ ҳозирча Tesla ердаги транспорт воситаларига эътибор қаратган.