Миллиардер Роман Абрамович 2022 йил февраль ойида етти нафар фарзандини миллиардлаб долларлик активларни назорат қилувчи ўнта трастнинг бенефициарига айлантирди. Бу ҳақда The Guardian хабар бермоқда.
Нашр Абрамович манфаатларини кўзлаб яратилган ўнта махфий оффшор траст 2022 йил февраль ойи бошида, Украинада уруш бошланишидан уч ҳафта олдин тезда қайта ташкил этилганини кўрсатувчи ҳужжатларни кўриб чиқди.
Бу Ғарб ҳукуматлари Россия қўшинлари Украинага кирса, россиялик олигархларга нисбатан санкциялар қўллаш билан таҳдид қилганидан бир неча кун ўтиб содир бўлди.
Ишонч ҳужжатларига киритилган ўзгартиришлар Абрамовичнинг етти нафар фарзандини (энг кичиги тўққиз ёшда) уларнинг нафақа олувчисига айлантирди.
Ушбу активларнинг қиймати камида 4 миллиард долларни ташкил этади. Forbes маълумотларига кўра, Абрамовичнинг бойлиги 8,7 миллиард долларни ташкил қилади.
The Guardian нашрининг ёзишича, ўзгаришлар тадбиркорнинг фарзандларини отаси билан боғлиқ активларнинг, жумладан, ҳашаматли кўчмас мулк, яхталар, вертолётлар ва шахсий самолётларнинг сўнгги бенефициар эгасига айлантирган.
Trastларнинг кенг кўламли қайта ташкил этилиши Ғарб давлатларининг аввалроқ Роман Абрамовичга тегишли деб ҳисобланган активларни музлатишга уринишларига барҳам бериши мумкин.
Мисол учун, жорий йилнинг декабрь ойида Канада россиялик тадбиркорга алоқадор Британиянинг Виржиния оролларида рўйхатдан ўтган Granite Capital Holdings компаниясидан 26 миллион доллар мусодара қилишини айтган эди.
Бироқ, ҳужжатларга кўра, Абрамович Granite Capital’га эгалик қилувчи ҲФ Trust’нинг бенефициари бўлишни тўхтатган. Бу жойни унинг болалари эгаллаган.
Изоҳ (0)