Чад инсон ҳуқуқлари ташкилоти президенти, ҳуқуқ ҳимоячиси Барадин Бердей Таргио бошчилигидаги 11 нафар зобитдан иборат гуруҳ республикадаги вазиятни беқарорлаштиришга уринди, уларнинг ҳаракатларига чек қўйилди, деб хабар бермоқда Reuters.
Чад хавфсизлик хизмати 8 декабрдан бошлаб бир ой давомида фитнага алоқадор шахсларни ҳибсга олган.
«Конституциявий тузумни бузиш, жиноий ҳамжамият яратиш, ноқонуний ўқотар қурол сақлаш ва жиноятга шериклик моддалари билан иш қўзғатилган», — деб тушунтирди Чад алоқа вазири ва ҳукумат вакили Азиз Маҳамат Солиҳ. «Тергов давом этмоқда, ҳукумат бу ишни ёритиш ва айбдорларни аниқлаш учун ҳамма нарсани қилишга киришган».
Чадда президент Идрис Дебининг вафотидан кейин тузилган муваққат ҳукумат икки йилдан бери фаолият юритмоқда. Деби 1990 йилдан бери ҳукмронлик қилган, 2021 йил апрель ойида олтинчи муддатга сайланган, бироқ ўша ойда исёнчилар билан жангда олган жароҳатлари туфайли вафот этган. Шундан сўнг унинг 38 ёшли ўғли Маҳамат Идрис Деби ҳокимиятни қўлга олди ва муваққат ўтиш ҳукуматини тузди, Чад ҳукумати ва парламенти тарқатиб юборилди. У ўтиш даври 1,5 йил давом этишини, шундан сўнг бошқарув сайланган ҳукуматга ўтишини таъкидлаганди.
Октябрь ойи охирида, ўтиш даври ҳукумати тузилганидан 1,5 йил ўтиб, Чадда намойишлар бўлиб ўтди. Расмий маълумотларга кўра, 50 га яқин одам, жумладан ўн нафар хавфсизлик ходими ҳалок бўлган. Ҳуқуқ фаолларига кўра, ҳақиқий қурбонлар сони анча юқори, ҳалок бўлганлар орасида қуролсиз тинч фуқаролар ҳам бор. Тўрт кунлик суд жараёнидан сўнг 262 киши тўқнашувлардаги иштироки учун 2 йилдан 3 йилгача қамоқ жазосига ҳукм қилинди. Ўтиш даври ҳукумати ўз мандатини яна икки йилга узайтирди.
Изоҳ (0)