АҚШ Туркия номининг ёзилишини расман Turkiye деб ўзгартирди. Буни Давлат департаменти тасдиқлади, деб хабар бермоқда Deutsche Welle.
Бир неча ой аввал Туркия президенти Ражаб Тоййиб Эрдўғон ҳукумати дунё давлатлари ва халқаро ташкилотларни Туркия (инглизча имлоси Turkey)ни курка паррандаси (инглизча turkey) номидан фарқлаш мақсадида мамлакат номининг туркча имлосини қабул қилишга чақирганди.
Имло ўзгариши биринчи марта АҚШ Давлат департаменти томонидан АҚШ ва Туркиянинг ИШИДни молиялаштиришда гумон қилинганларга қарши қўшма ҳаракатлари ҳақидаги баёнотида кўзга ташланган. Кейинроқ расмийлар имло ўзгарганини тасдиқлади, бироқ талаффуз ўзгаришсиз қолишини айтди.
«Туркия элчихонаси биздан ўзаро алоқаларда ушбу имлодан фойдаланишимизни сўради. Департамент сиз бугун кўрган имлодан кўплаб расмий дипломатик ва икки томонлама контекстларда, жумладан, оммавий коммуникацияларда ҳам фойдаланмоқда», — деди Давлат департаменти матбуот котиби Нед Прайс.
АҚШ Давлат департаменти хорижий давлат номлари учун стилистик қоидаларини камдан-кам ўзгартиради.
2021 йилда Эрдўғон лотин ёзувидан фойдаланадиган давлатлар ва халқаро ташкилотларда Туркие имлосини изчил қўллаш ҳақида фармон чиқарганди. Ўзгартирилган ном Бирлашган Миллатлар Ташкилоти (БМТ) ва НАТО, шунингдек, Канада, Ҳиндистон, Австралия ва Янги Зеландия томонидан қўлланмоқда.
Изоҳ (0)